唔好怪媽媽想瞓耐啲喇！ 研究：女性平均需要嘅睡眠時間比男性多20分鐘

媽媽一日嘅時間表總係排得密密麻麻，連食飯都要快食，想瞓飽簡直係天方夜譚！最近英國羅浮堡大學睡眠研究中心嘅科學家針對210名中年男女睡眠時間作調查，發現女性平均需要嘅睡眠時間比男性多20分鐘，原因係女性嘅大腦運作比男性更複雜！

女性一向感情較男性豐富，心思亦比男性細膩，而作為媽媽後，更要時刻記著每個家人嘅生活習慣、喜好、家務各種大小事，仲要隨時一心幾用，同時快速處理幾件事，真係腦細胞少啲都唔得㗎！

用腦過度就梗係需要俾個腦休息下啦！當人進入深層睡眠之後，大腦就會將平時負責思考記憶、語言等嘅皮質層從感官中脫離，俾大腦進入修復模式，所以睡眠嘅主要功能就係令大腦自我修復。

不過作為媽媽，邊有可能會瞓得夠，半夜瞓瞓下仲隨時有可能被BB喊聲嘈醒、被孩子踢醒、被老公鼻鼾聲嘈醒、擔心孩子凍親而半夜起身為孩子蓋被⋯⋯基本上每晚都冇一覺係瞓得好嘅。而研究除咗指出女性平均嘅睡眠時間比男性多 20 分鐘之外，亦表明睡眠不足會為女士們帶來唔少副作用，包括抑鬱、易怒等負面情緒，所以好難怪媽媽們長時間都處於脾氣暴躁嘅狀態！

所以想媽媽每日都有好臉色同平和嘅心情，爸爸們不妨盡量幫手媽媽喺早上嘅工作，俾媽媽瞓多一陣都好吖！

Text: Mami Editorial

Photo Source: pinterest

Source: independent