自從成為媽媽後 感到自己無論身體定心境都變老嘅5件事

明明自己只係2、3字頭，本應仲有大好青春，但自從成為媽媽後，「年輕」呢兩個字就好似離自己愈黎愈遠，除咗身形、打扮已同以前有極大分別外，連精力都大不如前，以下呢5件事，媽媽們又有冇同感呢？

1. 體態改變

自懷有BB開始，媽媽嘅身形開始變得愈黎愈圓潤，一心諗住BB出世後就會回復未懷孕前嘅體態，但現實係橙皮紋唔會消失，原先陀BB嘅巨肚變成肚腩，腰身依舊咁粗，胸部更慘不忍睹⋯⋯完全同懷孕前嘅自己判約兩人，身形體態嘅變化令好多媽媽失去自信，覺得自己不如年輕時嘅纖瘦美麗。

2. 衣著打扮

身形嘅變化，加上冇時間打扮，好多媽媽都為掩藏身形上嘅缺陷或貪方便快捷，幾乎幾套衛衣、牛仔褲、長裙輪流著，每隔兩三日就會重覆配搭，面上總係淡妝或素顏示人，除咗省卻買化妝品嘅錢，亦唔駛擔心抱BB時，化妝品會整污糟BB。不過，偶爾出街見到時尚亮麗嘅女仔，再望望自己，會好慨嘆自己好似失去咗扮靚嘅樂趣。

3. 飲食

以前想食咩就食咩，想幾豐富有幾豐富，仲可以慢慢嘆；而家好多時會為餵母乳而選擇性戒口、因湊仔壓力大而腸胃不適要飲食清淡、為求方便快捷隨時湊BB而食簡單可速食食品、甚至唔食！就算帶BB出街食，都盡可能叫啲BB都有份食嘅食物，免得爸媽食緊嘢時，BB扭食但咩都唔食得而哭喊⋯⋯

4. 娛樂

打機可以日以繼夜、可以隨時同姐妹淘行街、shopping、high tea⋯⋯呢啲自由自在嘅日子只停留喺以前。做咗媽媽後，自己有空閒嘅一刻已經值得偷笑了，好多時只會畀大腦放空下，滑下手機就算，同朋友嘅約會更係少之又少。

5. 精神體力

以前覺得自己精力無窮，想煲劇、打機到通宵達旦都冇問題。但BB出世後，體力就好似急速下降，每日總係由朝忙到凌晨，只要係清醒時間都總係覺得自己冇咩精神、瞓得唔夠，連抱耐啲BB都會感到無力。面對自己咁後生就咁冇精神嘅景況，真係想唔認「老」都唔得！

其實成為媽媽後都可以活得漂亮有活力，如果感到自己變老，羨慕年輕時嘅自己，意味著係時候要愛錫自己多一啲！不妨喺湊B生活中偶爾「放過」自己，將BB交畀另一半或親友暫托，間中裝扮一下自己、食餐好嘅、同朋友約會，令自己重拾年輕感覺！

Text：Mami Editorial

Photo Source: Pinterest