download MamiDaily 親子日常 app
【當你長大了 我卻變小了】

【當你長大了 我卻變小了】

爸媽分享 家庭關係
By 僑蛋.搗蛋 on 18 Feb 2019

今日無帶僑蛋,自己一個落街買餸。行行下遇到一個嫲嫲帶住兩個小朋友,妹妹大概3歲,哥哥5,6歲吧。妹妹大概行到累了,就叫嫲嫲抱。嫲嫲抱住個妹妹好重,就話早知帶架BB車落黎啦。

過左陣嫲嫲突然講「唉,呢家就我推你地坐bb車,將來都唔知有無人推我坐車」

妹妹就問「你咁大個仲要坐bb車?」

嫲嫲就話「係呀,你地就越黎越大個,我就慢慢變番做BB,如果將來我要坐車你會唔會推我呀?」

突然後面一直無出聲既哥哥就大大聲話「我會推咖!等我黎推!」

shutterstock_115727680

我啲眼淚差啲飛出黎....做左媽咪真係特別眼淺...

但我好希望呢對兄妹係大個左既時候仍然會記得呢個承諾...

同時亦令我諗起家中既父母....係我地一路望住仔女慢慢成長既時候唔好忘記我地既父母亦都越黎越老。

有時一個電話一餐飯就已經令佢地好開心。

做囡個陣,成日唔係屋企,媽咪成日埋怨我唔打電話比佢,我覺得好多餘,又唔係成日見唔到,打去無啦啦要講啲咩好?媽咪話打黎問候一句就好足夠。

結婚後某一日我聽夠左佢成日話我唔打比佢,於是我連續幾日係午飯時間打去講一句「我打黎問候你」然後就收線,希望可以塞住佢把口,出乎意料媽咪居然好開心,然後我就開始反思我到底係咪真係關心得佢太少?

1550502739547982F8000A-17FF-402E-82E8-8486587CE703

於是我開始日日打比佢同佢傾電話,出街分別個陣同佢講句愛你唷,生日既時候自己整個蛋糕比佢,多啲同佢去下旅行,佢想要啲咩盡量滿足佢,當佢係僑蛋二號咁去寵愛佢。

因為我好怕有一日佢地突然走左我先去後悔無好好咁陪佢地照顧佢地。

有啲人為左工作忽略左屋企人,「我唔做野邊有錢去照顧佢地呀?」其實只係我地一廂情願以為佢地需要物質既照顧,其實最重要既係你地個心。有無好好用個心去對待佢地。

可能有一日會成為呢個嫲嫲所講既BB,要坐輪椅,要人幫手大小便,要人餵飯。你會選擇好似佢地細個咁照顧你定送去老人院就算?

==============================

Text:僑蛋媽

Photos Shutterstock & 僑蛋媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道