只想保護好BB 常令新手父母精神繃緊5件日常事

只想保護好BB 常令新手父母精神繃緊5件日常事

媽媽心事親子相處
By Mamidaily on 08 Feb 2019

BB自出世起,爸爸媽媽最能感受到「養兒一百歲,長憂九十九」呢句說話嘅滋味,亦深深體會到做父母嘅唔容易。好多平日慣常睇到嘅小事,若然發生喺BB身上,爸爸媽媽都會視之為嚴重大事!尤其係以下呢5件事如果冇及時注意好,有機會令BB出現窒息嘅險況,令新手父母提心吊膽!

1. 掃風冇嗝氣

由於初生BB胃同食道之間嘅賁門(胃部入口)未發育成熟,飲咗嘅奶汁好容易沖過賁門嘔吐出黎(俗稱「嘔奶」),導致嗆喉窒息,所以爸爸媽媽每次餵完BB餵奶之後都一定要為BB掃風,令BB吐出腸胃中空氣,減低嘔奶引致窒息嘅風險。但有時爸爸媽媽掃咗好耐風,BB都唔打嗝,又唔敢放下BB,令爸爸媽媽又急又攰。

建議:

如果BB未能打嗝,媽媽可以先將BB打側躺,畀BB休息10分鐘左右再掃風,因為BB飲奶、打嗝都需要花力氣。先讓寶寶休息數分鐘,才會有力氣進行第二輪掃風。

shutterstock_694759648 (2)

2. 平躺溢奶

有時掃完風後,放返BB去床仔,都會發現BB口角有少少奶溢出,爸爸媽媽都會好緊張呢少少奶都會有機會令BB嗆喉窒息,係當BB打平瞓、頭仔正面向上嘅時候,嘔吐物容易進入氣管,導致窒息。

建議:

幫BB掃完風後,如果想將BB放返床仔,可以將BB輕輕打側瞓,用毛巾卷一卷攝喺BB身嘅另一側,幫助維持姿勢。即使BB嘔奶,也只會從口角溢出,而不會被嗆到。

shutterstock_1299608398

3. 誤食小配件

平時無論幾小心都好,BB都總會好似識變魔法咁,隨時搵到啲細小物件放入口,尤其係BB已經識爬識走嘅時候。

建議:

喺忙緊/無法盯緊BB嘅時候,將BB放喺確保冇危險細小物件嘅BB床/圍欄等嘅安全範圍內;當要將BB解放出黎活動嘅時候,要確保有一個大人會隨時喺BB隔離,睇實BB嘅一舉一動。

shutterstock_578036911

4. 床上物品掩面

忙完一大輪,好唔容易先氹到BB瞓著覺,爸爸媽媽終於都鬆一口氣,諗住自己都可以休息下,但個心偏偏放心唔落,每隔一陣都要睇下熟睡中嘅BB,檢查下BB有冇趴睡、有冇被物件掩蓋口鼻、有冇呼吸⋯⋯

建議:

確保床上冇任何不必要嘅毛毯、毛公仔、毛巾等,如果怕BB瞓覺會著涼,可以改用防踢包被畀BB當被蓋。

shutterstock_1406425845. 傷風感冒會鼻塞

天氣忽冷忽熱,BB同家人都容易會有傷風感冒,令BB隨時生病。當BB生病時,最令爸爸媽媽擔心嘅莫過於係BB年紀小小又唔識得將鼻涕擤出黎,形成鼻塞而難以呼吸,睇到BB難受到喊晒嘅樣,更令爸爸媽媽心痛又難過!

建議:

可將毛巾放入溫熱水中擰乾,熱敷喺BB鼻上,注意小心唔好捂住BB嘅口鼻),呢個方法可以軟化鼻內黏稠鼻涕、改善鼻塞,最後再用吸鼻器將BB鼻內嘅鼻涕吸出黎。

何謂嬰兒猝死症?

嬰兒猝死症係指初生至一歲嘅嬰兒喺睡眠時突然死亡,且死因不明,最常喺嬰兒出生後首6個月內發生,尤見於嬰兒2至3個月大時。喺香港並唔常見,每10,000名嬰兒中,有1至3名嬰兒死於該症。目前專家仍未能預測邊啲嬰兒會死於嬰兒猝死症。

Text: Mami Editorial

Follow Instagram: MamiDaily


Share to Facebook