屋企多個活寶貝過新年 原來咁開心 有BB過新年嘅3個好處

「年～又過年～」年年都過新年，但做咗爸爸媽媽、有BB一齊過嘅新年，感覺別有意義！

1.屋企氣氛更熱鬧

有BB喺屋企一齊過年，畀BB壓歲錢、為BB著上新年裝、有BB陪親戚好友一齊玩、氹得老人家笑唔攏嘴⋯⋯一切一切都會令爸爸媽媽感到今個新年更有氣氛、更熱鬧！以前唔太注意新年佈置嘅爸爸媽媽，都會為咗令BB感受到濃烈嘅新年氣氛，精心挑選BB鍾意（其實係自己鍾意？）嘅卡通人物揮春同利是封畀BB，仲會為BB著上新年裝瘋狂影相，只想為BB好好紀錄重要嘅成長時刻！

2. 行年宵更開心

以前兩公婆行年宵可能好多時都係得個「行」字，好少真正買到嘢返屋企，但有咗BB之後，只要見到BB有興趣嘅氣球、玩具⋯⋯以前嫌「唔實用」或「阻掟」嘅嘢都會搶住買，只為BB笑得開心就得！

3. 可以收利是

婚後未有BB，好多時利是都係得個派字，雖然送上祝福係開心，但收到利是嘅感覺相信都會比派嘅更開心。有咗BB之後，就可以又派又收喇！只係收利是嘅人變咗係BB，不過爸爸媽媽會更開心，因為BB收到親朋好友嘅祝福更重要！

Text: Mami Editorial