新婚夫婦過新年 一次解開10個常見嘅派利是問題

新婚夫婦過新年 一次解開10個常見嘅派利是問題

靚媽鬆一鬆
By Mamidaily on 31 Jan 2019

仲有幾日就到大年初一,各位入定晒利是封未呢?相信新婚夫婦都會對以新身份過新年有好多疑惑,特別係派利是方面,如:封利是應該派畀同事同上司嗎?派單封定雙封好?一於等小編為大家一一解答啦!

shutterstock_549244888

1.封利是要新鈔?

利是都係意頭嘅象徵,又唔一定要用新鈔嘅,就算新定舊都好,相信收到嘅人一樣咁開心!

2. 要派利是畀咩人?

一般係派畀所有未婚嘅晚輩,同比自己年紀小嘅同輩;有啲無論親友長輩,凡未結婚嘅都需要派利是(視乎家族習慣而定);為你服務一整年嘅大廈看更同清潔嬸嬸,都最好派利是畀佢哋;假期後返到公司,亦可以派畀未婚嘅同事。

shutterstock_1278874081

3. 利是派單封定雙封?

一般已婚夫婦,第一年派利是當然要雙雙對對啦!所以婚後首年夫婦二人都會各派雙封利是。即使派畀樓下看更或公司同事,都盡量比兩封,不過金額就自行決定點分配喇!但由第二年開始,面對同事而對方唔認識你嘅另一半,係可以選擇派單封。而離婚後嘅夫婦,就可以各自派單封。

 

4. 要派畀已婚嘅弟妹嗎?

唔同屋企有唔同做法,有人會照派畀已婚嘅弟妹,有人唔會,所以最好先問長輩如父母或祖父母嘅意見,其實最緊要都係大家開開心心啫!

shutterstock_1286833075

5. 要派畀未婚嘅長輩/上司嗎?

好多人覺得派利是畀長輩或上司會有啲尷尬,反之然亦係,面對已婚後輩派利是畀自己(尤其係女上司),難免感到唔自在。其實派利是都係心意同祝福,並無明確規定派唔派得,如果對方性格唔錯,平日相處得好好嘅話,不妨派畀對方開心一下;但如果唔清楚對方嘅性格或感覺會介意嘅話,亦可選擇唔派,有啲人甚至會避免尷尬而選擇放假避年呢!

6. 注意利是封顏色?

中國人有好多傳統禁忌,派利是最好係用喜慶嘅紅色系,亦會避免用綠色、藍色、白色等象徵白事嘅顏色,但近年嘅利是封設計五花八門,有啲會就返卡通人物嘅色系,如史迪仔、三眼仔等嘅藍或綠色,如果需要派畀長輩嘅話,最好都係用返傳統嘅紅色利是封!

shutterstock_356783777

7. 派利是派到幾時?

正月初一至十五都係屬於新年,所以一般人都會派至正月十五。而利是最好等到正月十六或之後先拆。

8. 親友帶禮物來拜年,是否需要「擇利是」?

喺新年期間親友帶賀年禮品到自己屋企拜年都應該「擇利是」,即係畀返一封回禮嘅利是佢哋,面額一般係50或100蚊。

9. 咩情況下唔可以派利是?

如果屋企有親屬過身,即係白事,按傳統係唔應該派或收利是,亦唔可以去親友屋企拜年,要過咗100日先可以收或派利是。

10. 收到吉利是點算好?

有時打開利是封發現冇錢喺入面,真係「大吉利是」!雖然可能係對方忙中有亂入漏咗,但係喺新年收到唔好意頭嘅利是,心情都會即刻黑晒,擔心會影響自己運程。如果真係好在意嘅話,其實係可以自己入番錢落去化解,新年最緊要開心!

Text: Mami Editorial

Follow Instagram: MamiDaily


Share to Facebook