【痛苦方法甩肉芽 BB肚臍肉芽大作戰】

【痛苦方法甩肉芽 BB肚臍肉芽大作戰】

Bloggers 專欄媽媽日常須知孕媽專區
By Mamidaily on 30 Jan 2019

湜弟嘅臍帶喺第8日左右就甩咗。滿月去健康院檢查,護士問起臍帶情況,我地先發現湜弟嘅肚臍比較凸,除咗係因為小腸氣(疝氣),原來入面仲有粒肉芽!因為唔夠膽反起肚臍睇入面,所以我地一直冇留意到… 諗返起,因為湜弟腳力異常好,每次沖涼換片都不停踢腳,加上一早已經甩臍帶,令到我地對清潔肚臍嘅工作鬆懈…因為咁,令到湜弟受苦….

滿月當日,醫生先同我地解釋肉芽成因「斷臍後未癒合的傷口受異物的刺激形成」,再解釋切除肉芽嘅操作「由於肉芽長得比較大,護士會用線將肉芽根部綁緊,切斷血液供應,幾日後肉芽就會淍謝再自行脫落」。我地亦需要每日小心用熟水清潔及保持肚臍乾爽。如果肉芽長得比較細,醫生可以用藥水令佢淍謝。

護士綁線嘅時候,由於要確保湜弟雙腳唔亂踢,媽媽需要用力按實佢,呢個時候,寶寶已經喊到癲咗 … 睇住兩個護士合力綁線,再加上肚臍有血水,媽媽有一刻真係唔敢望,雖然護士話肚臍冇神經,寶寶喊只係因為冇得踢,唔係因為痛…… (但媽媽好心疼)

3 日後返健康院再檢查,護士話肉芽腫咗,比之前更大粒⋯ 然後兩個醫生幫忙再檢查,發現原來上次綁線綁得唔夠深唔夠緊,未完全切斷血液供應,所以腫咗,好彩未去到發炎咁嚴重!佢就叫護士再綁過⋯⋯

今次得一個護士,所以我除咗要盡力按實湜弟對腳,仲要幫手攞起條線,等護士可以打結…呢個時候,粒肉芽就甩咗!肚臍就開始流血⋯護士好冷靜咁用棉花棒止血,用咗4-5枝棒,終於止到血⋯ 但湜弟已經喊到冇聲,只得返一個好絕望既表情望住媽媽我⋯ 真係好心疼好想喊⋯

護士之後解釋其實最終目的都係想肉芽甩,所以都算完成。只不過,我冇諗過會係呢個咁痛苦既方法甩⋯⋯之後幾日,湜弟好似有心理陰影,全日都瞓唔好,瞓時會尖叫、個身會震,唯有抱抱多d去安撫佢啦⋯⋯

冇諗過啱啱滿月就被肚臍肉芽折磨,臍帶消毒清潔工作記得要確實進行,多做無害呀!

==============================

Text & Photos:湜澄媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: MamiDaily


Share to Facebook