請唔好再亂畀零食BB! 媽媽難以開口推卻嘅3個「盛情」

請唔好再亂畀零食BB! 媽媽難以開口推卻嘅3個「盛情」

媽媽心事
By Mamidaily on 30 Jan 2019

BB可愛到令周圍嘅人心都融化!好多時媽媽帶BB出街,總會遇到親切嘅鄰居或陌生人,見到BB總會露出一臉慈祥,但係以下呢3個善意嘅熱情舉動,有時會令媽媽內心出現無數嘅讀白:「唔好呀!」、「好污糟呀!」但臉上仍要掛住微笑,唔好意思推卻人家嘅好意,再急急搵理由帶BB走。

1. 搣BB臉豬

BB通常塊面都肥嘟嘟好可愛,最常引起其他人如路人或鄰居忍唔住摵BB嘅臉豬,但係好多時都會令媽媽內心感到唔開心,一黎係對方未洗手怕將病菌帶畀BB嘅衛生問題,二黎係有啲BB特別怕生,好抗拒陌生人嘅觸碰,會令小BB受到驚嚇,無論邊個情況都會令媽媽心裡好唔捨得,但望住對方一臉好鍾意BB嘅模樣又唔好意思出言怪斥。

shutterstock_459346873

2. 抱BB

同上都係基於衛生同BB心理問題,另外氣味亦會令媽媽心驚驚,如身上有煙味嘅人士,或有啲男性身上噴古龍水、女性身上噴香水等具刺激性氣味,媽媽都會好怕呢啲化學氣味被BB吸入,會引起健康問題; 另外面上沾有唔同色彩嘅閃粉眼影等化妝品嘅女性,喺抱BB嘅時候有機會掉落到BB身上,或被BB左右掙扎時唔覺意嘴仔掂到而食落肚,亦會令媽媽臉色變得好難睇。

shutterstock_673856206

3. 畀零食BB

好多時長輩都會好疼愛小朋友,見面時都會將身上嘅餅乾零食畀BB,但由於湊BB嘅年代太久遠,好多時都會忘記咗小朋友幾大先可以開始食得呢啲零食。通常媽媽都會禮貌性代BB收下,但如果遇到有長輩「熱情」到親自餵BB食,媽媽就絕對難以「袖手旁觀」!

shutterstock_501635440

所以為免令場面尷尬,大家見到BB時都應盡量收儉一下自己嘅熱情,唔好令媽媽難做喇!

Text: Mami Editorial

Follow Instagram: MamiDaily


Share to Facebook