【母乳心路歷程  媽媽為餵母乳多次流淚】

【母乳心路歷程 媽媽為餵母乳多次流淚】

Bloggers 專欄靚媽鬆一鬆媽媽日常須知孕媽專區媽媽心事親子相處
By Mamidaily on 29 Jan 2019

眨下眼,雪雪十個月,我就餵母乳餵了十個月。現在餵得相當舒服,開心,甜蜜。其實當初真係有血有淚。

第一口母乳
3月26 下午3時正。雪雪出世,當醫護人員替他清潔身體後,就會立刻把BB抱在你身上,然後輔助你餵第一次奶,亦都係實錢要喺BB出世一小時內,俾佢食到第一口母乳。
當時嘅我,其實什麼也不知道,仲未興奮完,未平伏心情。只係醫護人員將乳頭擺入BB口中, BB又唔知啜唔啜到,啜啜下又放口,醫護人員又重新擺過,冇咩感覺,我就係以為咁就係餵緊母乳啦。

回病房後
返上病房之後,醫護人員幫雪雪打針,跟住好快又會有好多,不斷唔同嘅護士走入嚟,問你俾咗BB食奶未,問你識唔識點埋身,教你埋身,BB如果瞓咗,又會問你有冇自己手擠奶。這一切一切,我都以為自己係識嘅,因為BB佢係可以含到我嘅乳頭,只係有陣時難控制啲,又未佢好習慣抱起佢。
不過去到第二晚就補咗奶粉,因為佢八個鐘以上冇小便。
而雪雪因為成日都瞓咗,所以其實冇咩時間俾佢食奶各樣,自己都係不停咁手擠奶,但又冇乜進展,姑娘就係不斷叫你手擠,先會有奶。
醫院入面,有母乳姑娘,佢地專教埋身同手擠奶,佢地其實好好。

shutterstock_528384532

出院
返到屋企,我都係好似係醫院咁,間中就手擠奶,又將BB埋身食奶 。同樣地都覺得餵奶係一件好舒服輕易嘅事,冇乜大感覺, BB成日瞓咗。

健康院
出院之後第二日,就約咗去睇健康院,點知發現雪雪體重跌得太多,多過7%,所以又要即刻入醫院去睇佢有冇其他問題。
入院後,其實醫生就係建議話我要補奶粉,話佢唔夠水份話佢唔夠奶。我哋即刻好緊張,申請左Home leave,就去買奶粉,返到屋企亦都補咗第二次奶粉。

回家後- 一直至兩個月
之後,雪雪就開始唔肯埋身食,不過我慢慢開始上奶,就開始泵奶。奶量都唔錯,可以係半奶粉半人奶。

過咗兩三日到,雪雪終於肯埋身,但唔知點解係痛痛地,不過見到佢肯埋身食,仲食咗45分鐘,成家人都好開心。一星期到,就無再補奶粉。

跟住落嚟,都係不停咁泵奶,又埋身。

但事情開始出現問題,每次埋身都好痛,乳頭仲開始損。

每次餵奶都要兩個人合力,媽媽/老公/陪月捉住佢手,我就抱住佢,因為雪雪又好緊張,會周圍抓,抓到我乳頭傷口,又喊。其實諗起都慘,俾人捉實哂。

shutterstock_695265856

然後,我們開始不停出入醫院健康院,搵母語姑娘教餵奶,公立醫院嘅姑娘好好,俾咗好大鼓勵,但都係好痛。
去到第二個星期,仲出現乳腺炎,非常痛,非常痛,又發燒,好辛苦。
乳腺炎好返,好快有復發,其中有次仲高燒到40度,成個人打冷顫,真係好辛苦。好返之後,乳頭傷口又痛,又話真菌感染等等。不過呢啲情況全部都可以繼續餵奶,而我又好堅持。
所以係頭果兩個月,每次餵奶都好痛。就算泵奶都係痛。其實我直情覺得自己有啲產後抑鬱,因為我為餵奶喊過好多次,佢每一次喊我都好唔開心我都好驚,每一次夠鐘食奶對於我來講就係惡夢。痛到一個地步,我心裏面諗,我嘅傷口唔知邊一日先會好返,着衫換衫又痛。跟住我就係不停咁上網睇人哋嘅位奶片,學點樣餵奶,又學又試又痛又流血又再學。用乳頭盾唔得,轉姿勢唔得.....
去到一個點,我媽咪都想叫我放棄,同我講唔想我咁辛苦,其實因為我咁樣唔開心,我都錯失左好多同雪雪最初快樂嘅時光,但我真係好想成功,我好想好似人哋咁,同雪雪有呢個咁溫馨親密嘅時刻,好想可以親自將母乳俾雪雪。

兩個月 尋找幫助
到咗最絕望嘅時候,我記得有朋友介紹我去搵母乳義工,咁我心諗,就試吓啦,唔知幫唔幫到我,如果真係幫唔到就算啦。
佢上嚟睇我埋身,佢示範一次俾我睇,真係一啲都唔痛,我非常之感動,好多謝佢。
跟住落嚟都仲經歷左兩三個禮拜痛痛地又好似好啲有痛痛地,其實都灰心。

直到一百日,雪雪好似開竅咁,終於埋身一啲都唔痛,傷口亦都慢慢好返,(我終於見返自己唔受傷嘅乳頭)
至於乳腺炎嘅問題,透過慢慢調整餵奶模式,唔再特別成日為完又再泵,或者泵完手擠,唔刻意做多啲奶,維持返供求平衡,情況就改善啦。

1548774841323850811247_404164583686272_4036624188511879168_o

直到而家, 餵了10個月啦仲繼續緊,我真係仍然好感恩,當初冇放棄,亦都好多謝屋企人同老公,仲有好多媽媽朋友支持同行。宜家餵奶的滿足感,是無野可取代。曾經義工講過,其實餵奶只是一個開始,過程中有困難,或者旁邊人點講你,話你餵奶有咩唔好,唔好再餵etc..(so far 無人話我 :]),也是預演未來媽媽路,將來教育孩子,也同樣遇到難題,旁人也或會指點,所以路仲好長。但同時,餵不到也只是一件小事,未來路仲好長。世上有邊個媽唔想孩子好。

未生小孩前,真的不知餵母乳係咁,其實以上的經歷,大部分母乳媽媽唔多唔少總會經歷過,或許你現在也正經歷,加油,好多人同你同行!

==============================

Text:雪雪雪媽的一些事

Photos:雪雪雪媽的一些事&Shutterstock

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: MamiDaily


Share to Facebook