過時過節都應避免過度飲食 孕媽媽喺過年期間嘅10個注意事項

過時過節都應避免過度飲食 孕媽媽喺過年期間嘅10個注意事項

孕媽專區
By Mamidaily on 22 Jan 2019

農曆新年係一個喜氣洋洋嘅大日子,喺開心嘅氣氛下,大部分人都容易失去自制力而暴飲暴食,尤其是身懷六甲嘅孕媽媽。為自己同BB嘅健康著想,想過一個平安又愉快嘅新年,喺過年期間應提醒自己注意以下10件事。

shutterstock_170304629

1. 遠離二手煙同嘈雜環境 

過年期間,好多時一家人會齊齊整整聚埋一齊閒話家常,當中不乏會有人喺室內食煙同打麻將,需留意嘅係孕婦吸入二手煙有機會導致胎兒發育不良、畸形、早產甚至死亡,孕婦應遠離二手煙;而嘈雜嘅地方亦有機會嚇親胎兒或影響孕婦嘅精神同情緒。

2. 穿著適合嘅服飾 

所有女性都鍾意打扮得光鮮亮麗過新年,孕媽媽都唔例外,但孕婦應避免穿著高跟鞋同緊身衣,以免出現重心不穩而摔倒、對胎兒造成危險;太緊身嘅衣服或會影響孕媽媽嘅呼吸,造成缺氧不適。

shutterstock_1204084933

3. 拜年時勿太操勞 

孕婦喺整個孕期都會容易疲勞,所以喺拜年期間都要注意身體,適時休息,避免同一日內走訪太多家庭拜年。如果孕婦過度勞累,消耗咗體力同氧氣,唔單止自己感覺疲憊,仲有機會令胎兒得唔到足夠氧氣同營養,影響胎兒生長。

4. 選擇適當的家務 

新年前後都少不免要清潔家居,但孕媽媽要避免做一啲粗重功夫,應揀一啲較輕鬆嘅家務黎做,如抹枱、掃地等。

5. 大掃除時唔好爬高 

過年前嘅大掃除,孕婦千祈唔好逞強自己包攬晒所有清潔工作,尤其係爬高爬低拆洗冷氣機、擦窗等,更唔可以用力搬動傢具,擔擔抬抬,應請老公或家人協助。

6. 避酒和少動物內臟 

孕婦應該多食新鮮食物,少食動物內臟同加工食物;孕婦亦應少食甜食、濃茶,避免引起胎兒興奮而出現胎動不安、臍帶纏繞等現象;而酒精係導致胎兒畸形同智慧低下嘅主要原因之一。

shutterstock_549749167

7. 避免吃生冷食物
未經處理好嘅生冷食物容易引起腸胃炎,令孕婦上吐下瀉,嚴重嘅話仲有機會會引起宮縮,造成早產。

8.避免過度飲食

孕媽媽應少食年糕、油飯,避免造成消化不良同脹氣,如果食太多而出現營養過剩嘅話,生BB都會有一定嘅難度哦!

9. 適當娛樂

唱K、睇賀歲電影、打麻將都係新年期間主要嘅娛樂活動,呢啲娛樂活動對孕婦同樣有巨大吸引力,但孕媽媽要注意自己嘅情緒,太緊張刺激嘅話可導致宮縮或不適。

10. 化妝 

孕媽媽適度嘅打扮,可以令自己感到愉悅,但係就唔建議過度濃妝艷抹,因為唔少研究證實顏色鮮艷嘅化妝品往往含有如鉛、汞等大量重金屬,不單止傷害肌膚,亦有機會被皮膚吸收、被胎兒接收,有機會影響胎兒健康。

Text:Mami Editorial
 

Follow Instagram: MamiDaily


Share to Facebook