張繼聰謝安琪夫妻之道 能同甘能同苦

張繼聰適逢同老婆結婚12周年，又再喺社交網站放閃彈，仲引用名句，公開話自己嘅婚姻係成功！

38歲張繼聰撇低一對仔女，同老婆謝安琪慶祝結婚周年。阿Kay仲悉心打扮，著黑色低胸長裙赴會，當然老公更係幫老婆影低唔少靚相，留言話，"A successful marriage requires falling in love many times ,always with the same person.」 By Mignon McLaughlin."

張繼聰同謝安琪可算係能共甘、能共苦嘅一對模範夫妻。當年謝安琪憑住「年度之歌」同「囍帖街」火速爆紅，更成為樂壇天后，橫掃樂壇唔少主要獎項，但當時張繼聰喺演藝事業未有太大起色，面對唔少網民抨擊，更稱張繼聰為「謝繼聰」係軟飯王。

張繼聰受到唔少打擊，跟不斷自我質疑：「我係咪一個一事無成嘅人呢？我係咪一個只靠太太嘅人呢？」結果壓力爆煲同時患上抑鬱症，更曾經尋死，但好在及時懸崖勒馬，打消自殺念頭。

其後張繼聰努力為自己喺演藝事業定位，最終喺電視台成功出位，成為大眾嘅「搞笑金句王」，形象貼地，超親民。生活上仍然做愛妻號，不時喺社交網站分享氹老婆嘅金句，喺母親節留言同老婆講：「母親節母親們負責快樂️！其他嘢我頂晒。」

但謝安琪懷孕後，歌唱事業開始就下坡，生完BB被網民話身材走樣，更拎返阿Kay初出道相作比較，直斥係「整容怪」，張繼聰都多次公開護航：「太陽係喺東邊升起，係唔需要證明，又唔使討論，因為係事實。就好似我覺得我太太有幾靚一樣！」

夫妻可以走下去唔係只係相愛，更係要好似張繼聰同謝安琪一樣能同甘，同患難。

Text：Mami Editorial

Photos：張繼聰@IG