係時候為屋企大掃除 媽媽必學10個家居清潔小撇步

係時候為屋企大掃除 媽媽必學10個家居清潔小撇步

靚媽鬆一鬆
By Mamidaily on 22 Jan 2019

話咁快就黎到農曆新年,相信各位媽媽都係時候開始忙碌起嚟,為「送舊迎新」做好準備!想屋企重新變得乾乾淨淨,將舊年嘅霉氣同唔開心嘅事一一掃去,媽媽快啲記低以下10個清潔好方法,將屋企徹底大掃除,迎接美好嘅新年啦!

1.檸檬+梳打粉去頑固油漬

抽油煙機、煮食爐附近充滿又黑又黃嘅油漬?試下將檸檬、梳打粉同暖水混合製成天然清潔液,然後用噴壺喺充滿油漬嘅地方噴上清潔液,靜等一陣後用舊牙刷輕鬆抹甩油漬,原本污糟嘅地方即時變得「立立令」,仲充滿檸檬清香!

shutterstock_1235703295

2.梳打粉+白醋去除洗衣機霉菌

洗衣機經長年累月使用,機內夾層容易累積污垢同霉菌,喺洗衣過程有機會污染衣物,應每個月應清洗一次。 媽媽可以用一個小盆盛載一條乾毛巾,將白醋倒入直至整條毛巾全濕,再加入一茶匙梳打粉。然後將沾有白醋同梳打粉嘅毛巾放入洗衣機,調較至脫水模式,完成後唔駛拎出毛巾,等1個鐘後再調較正常嘅洗衣模式再洗一次,直至完成後先拎取出毛巾。

3. 檸檬去微波爐異味

作為天然清潔劑嘅檸檬仲可以幫手去除微波爐因長期冇清潔而產生嘅異味,方法係將檸檬切開一半然後榨汁,將檸檬汁加清水稀釋,然後放入微波爐器皿,再放入微波爐內叮3分鐘,靜等5分鐘後先打開門,最後用乾布抹走蒸氣就可以。

shutterstock_743657464

4. 粗鹽為砧板殺菌除腥臭

平日用砧板處理生熟食物,除咗充滿腥味,仲會有唔少細菌黐附喺表面。想徹底清潔砧板,令家人食得更安心,媽媽可以利用粗鹽為砧板做個深層清潔!先將砧板濕水,再將粗鹽灑到砧板上,用力磨擦約3分鐘,粗鹽會磨走砧板表面嘅污漬同吸走異味,最後用清水沖洗乾淨,大功告成!

5 梳打粉去茶杯漬

新年要招待客人,如果茶杯充滿茶漬,未免太唔美觀而顯得失禮。媽媽可以喺有漬嘅杯內加入1茶匙梳打粉,再倒入熱滾水,浸約15分鐘後用百潔布刷洗,就可以徹底刷去茶漬。

shutterstock_408119482

6.漂白水去除膠邊霉菌

廁所、廚房嘅玻璃膠邊佈滿黑色霉菌點算好?媽媽可以將沾有稀釋漂白水嘅棉花蓋喺發霉位置上,靜待一晚後清走棉花,再用清水沖洗一就可以。

7.檸檬擦去水龍頭水漬

水龍頭、花灑頭呢啲長年用水嘅工具難免會水漬斑斑,佈滿灰白點,只要用切開嘅檸檬喺水漬位置來回擦幾下,再用清水濕布抹乾,就會變返「立立令」!

shutterstock_300616463

8.絲襪輕易清掉髮、天花牆身霉塵

地上每個角落都總會搵到好多掉髮嘅蹤影,但係如果用掃把掃嘅話,頭髮會好容易卡喺掃把上,媽媽可以利用將舊絲襪套喺掃把上,掃地嘅時候,頭髮就會通通黐喺絲襪上,一除低絲襪就可以一次過清除大量掉髮,非常方便!另外,舊絲襪亦可以幫手除去天花板上霉菌,方法係將舊絲襪套笠喺除塵把上,然後由天花中央掃向牆邊,利用絲襪產生嘅靜電將霉菌吸走。(注意: 千祈唔可以用用濕布,因為濕氣會令牆身受潮,有機會加劇發霉問題)

9. 白醋+報紙去玻璃污漬

想屋企嘅鏡同玻璃窗變得乾淨無痕?可以用白醋同清水以1:3嘅比例倒入噴壺中,然後噴喺玻璃或鏡子上,再用舊報紙抹乾淨就可以。

shutterstock_1281287038

10.檸檬去鏽漬

當家中有工具或物品出現鏽漬時,只要金屬冇鏽蝕,可以混合檸檬汁同牙膏(檸檬汁含有草酸能氧化鐵還原,而牙膏可增加稠度同研磨力),塗抹喺生鏽處後靜待約2至4小時,再用菜瓜布擦拭乾淨就可以。

Text:Mami Editorial

Follow Instagram: MamiDaily


Share to Facebook