當分享變成強搶嘅理由 3類令人討厭嘅家長

當分享變成強搶嘅理由 3類令人討厭嘅家長

媽媽心事親子相處
By Mamidaily on 15 Jan 2019

做咗家長後,無論要帶孩子去公園玩又好、返學都好,都需要面對各類型嘅家長。同為家長,大家都會深深體會到湊孩子嘅苦與樂,面對唔同嘅孩子都總會多一份體諒同寬容。只不過,呢份包容只係給予孩子而非家長,作為家長,係有責任先做好個人素質、以身作則再管教好自己嘅孩子,全因孩子嘅修養如何,會完全反映出父母嘅教養。以下3種都係媽媽們口中最常見令人反感嘅家長類型:

1. 以分享為理由強迫別人孩子分享

最近有網友媽媽分享,有日帶孩子去家樓下玩新買返黎嘅電動車,遇到另一位媽媽帶兒子經過,嗰位媽媽嘅兒子開口同媽媽講好想玩,於是嗰位媽媽就問網友嘅孩子可唔可以借給佢嘅兒子玩,但孩子玩得起勁,所以一口拒絕嗰位媽媽嘅請求,點知嗰位媽媽大大聲同兒子講,好似都想講埋畀網友媽媽聽咁話:「人哋唔分享都冇辦法㗎!」令網友媽媽非常唔忿氣,心諗:「一定要借畀你玩架咩?萬一整花或者撞爛,你賠唔賠番畀我?架車係屬於我哋自己私伙嘅,就算我個仔唔肯借我都唔會話佢!同你又三九唔識七!」

shutterstock_33242992 (3)

呢件事亦引起好多媽媽熱議,表示好多家長都濫用分享呢個理由,去強迫其他人嘅孩子分享自己嘅玩具,有啲媽媽為怕失禮,都會無奈拎去孩子玩緊嘅玩具畀要求嘅家長,但就令孩子唔開心;如果孩子唔肯交出手上嘅玩具,就會被指責係自私。雖然學會分享係美德,但出發點應該係要孩子心甘情願去分私自己私人物品,而公用物品就應該同孩子講要輪候同限時玩,共同遵守規則,而唔係被強迫分享或搶去,咁對孩子而言,分享只會係變成一件唔開心嘅事。

2. 當孩子無理取鬧唔加以阻止

有時去公園玩,孩子少不免會發生推撞;或去睇電影,孩子會大聲傾計,呢啲情況總會對其他使用者感到不悅。但使用者通常不悅嘅主要原因,並唔係因為孩子嘅舉動,而係父母嘅反應。有啲父母只會好敷衍咁勸小朋友「小心啲~」、「唔好講嘢喇!」,然後若無其事繼續做自己嘅事,對阻止小孩完全無效果。

shutterstock_406336018

如果小孩喺公園推撞其他小朋友,家長理應先拉小孩喺一旁,告訴孩子呢個行為係唔啱,會傷害到其他人,如果再係咁就唔可以再繼續喺呢度玩,畀小孩知道推撞嘅後果;如果喺安靜環境下喧嘩,家長如勸籲無效,應先將小孩帶離現場,話畀小孩知,一嘈就冇得入去睇電影,如實在無法控制孩子喺安靜場合下嘅表現,就應該考慮下次好唔好再帶年幼小孩出席呢啲場合。

shutterstock_397177645

3. 永遠認為自己孩子冇錯

有啲家長總係極度寵溺孩子,喺自己眼中,孩子永遠都冇錯,就算錯都係值得被原諒同包容,唔忍心出聲鬧孩子半句,更加冇可能接受到外人嘅指責。當孩子喺外面做錯事,如著鞋踩上座位,受到外人出言阻止時,呢類家長會反過黎指責外人「蝦細路」、「只係個孩子,咁都要計較?」令旁人大感錯愕,亦暗批呢類家長唔識教仔。

shutterstock_1205462746

好多時,家長都係愛子女心切,所做一切都係希望令子女開心,但亦應該將心比己,要顧及其他家長同孩子嘅感受。愛孩子更應教好孩子,而唔係縱容孩子。希望各位都可以成為一位有素質嘅家長!

Text:Mami Editorial

Follow Instagram: MamiDaily


Share to Facebook