BB出世後 婚姻關係起危機? 3個常令夫妻不和嘅地雷

BB出世後 婚姻關係起危機? 3個常令夫妻不和嘅地雷

媽媽心事
By Mamidaily on 03 Jan 2019

進入婚姻嘅殿堂,就代表係二人關係修成正果、從此過著幸福快樂嘅生活嗎?事實上,當二人行變成三人家庭之後,同另一半嘅關係就正式由戀人昇華成親人,共同撫養血濃於水嘅孩子。但呢個關係嘅轉變對唔少夫妻而言,亦係一個高難度嘅婚姻考驗。當接受呢個考驗,你願意為對方付出幾多? 你有將另一半嘅付出視為理所當然嗎? 你願意同對方一齊承擔責任嗎?

shutterstock_630815519

1.另一半重視BB多於自己

BB出世後,面對自己嘅前世情人,爸爸媽媽心都會軟晒,亦會將大部分注意力放喺呢個小情人身上,尤其係爸爸對女兒。雖然爸爸媽媽好樂於見到另一半愛錫自己嘅小朋友,不過有時都會呷醋,覺得另一半重視BB而忽略自己嘅感受。

shutterstock_560474986 (1)

2.家務分工不均

處理一個家庭嘅大小事務從來唔係一件容易嘅事,湊BB同做家務往往令爸爸媽媽感到非常疲倦,如家務嘅分配不均,其中要負責較多家務嘅一方會因為疲累而覺得唔公平,甚至埋怨對方對呢個家庭付出較少。尤其是當自己做緊家務嗰陣,見對方滑手機或出去玩,更會覺得心理唔平衡。

shutterstock_582234067

3. 另一半常常幫倒忙

唔幫手固然會令人嬲,但愈幫愈忙亦同樣會令人感到憤怒。如好唔容易先氹到瞓著嘅BB被另一半嘈醒、洗奶樽洗得唔乾淨、幫BB換片包唔緊而滲漏到,變相要自己重新做一次,呢個時候都會覺得對方「好冇用」,破壞雙方感情。

shutterstock_1054814954

其實屋企多咗個小朋友,夫妻關係由戀人變成戰友,最理想嘅情況係兩公婆互相扶持、共同努力去維持一個幸福嘅家。除咗以小朋友可以喺健康、愉快嘅家庭下成長為目標外,自己同另一半喺呢個家感到幸福感亦同樣重要。

Text: Mami Editorial

 

Follow Instagram: MamiDaily


Share to Facebook