冬季易引起BB各種皮膚問題 平日做好呢5件事保護BB肌膚

天氣轉冷，BB嘅肌膚比較容易變得乾燥而出現各種肌膚問題，如：甩皮、痕癢或出現濕疹等，想BB免受肌膚問題困擾，媽媽可以喺平日注意做以下5件事，令BB可以喺冬天都維持住皮光肉滑嘅狀態。

1. 沖涼水溫維持37至38度

有啲媽媽怕BB會凍親，會用好熱嘅水為BB沖涼，但係太熱嘅水會洗走皮膚天然嘅油脂層，令皮膚變得更乾同痕癢，所以水溫最好維持喺37至38度。另外，BB嘅沖浴時間最好喺10分鐘內完成，因為皮膚接觸得熱水愈耐，就愈容易流失自然油脂保護膜，令皮膚鎖水能力降低而令皮膚變乾、引起各種皮膚問題。

2. 密密為BB搽保濕乳液

如果想BB嘅肌膚時刻保持滋潤，媽媽平時應多為BB搽成分簡單、有效鎖住水分嘅潤膚露或保濕乳液，特別係喺開暖爐前同BB沖涼後5分鐘內，馬上為BB搽上潤膚露或保濕乳液，避免肌膚嘅水分流失。

3. 保持皮膚清潔

有時天氣太凍，有啲爸爸媽媽怕凍親BB嘅小屁屁，會將換片嘅次數減少，但就有機會令BB出現紅屁股，所以爸爸媽媽應該勤為BB換片，令BB的小屁股常處於乾爽狀態，保持BB個人衞生。

4. 穿棉質衣物保暖

就算天氣幾凍都好，爸爸媽媽為BB選擇衣物嘅時候，接觸到BB肌膚嘅內衣褲都應該盡量揀棉質、通爽透氣為主，特別係患有濕疹嘅BB，避免令BB嘅皮膚受刺激。

5. 保持家居衞生

要預防BB患上皮膚敏感，應時刻保持家居環境清潔，地毯同毛公仔都係容易積聚塵蟎同細菌嘅物件，應盡量避免畀BB接觸。

Text: Mami Editorial

Photo Source： Pinterest