BB被鬧完後嘅3個暖心舉動 令爸媽怒氣全消

就算BB平時幾可愛都好，都總會有令爸爸媽媽激氣嘅時候，如：換片就走咗去、未食完飯就扭計要去玩、唔肯飲水⋯⋯有時爸爸媽媽都會忍唔住情緒爆發而鬧BB，事後就非常責怪自己竟然發BB脾氣，擔心BB嬲咗自己，然而BB就會用以下呢3個舉動回應爸爸媽媽。

1. 黐住爸媽

被鬧完嘅BB可能會喺當刻喊唔停，不過好多BB都係好「善忘」，好快就會嘗試用唔同方式令爸媽「回心轉意」鍾意返自己，如攬實爸媽、將頭仔挨喺爸媽身上、刻意黐住爸媽⋯⋯試問爸媽又點抵擋到BB嘅撒嬌攻勢？

2. 撩爸媽玩

見到爸媽鬧完自己之後就一直唔理自己，好多BB都會願意做先「破冰」嘅角色，主動拎起玩具去撩爸媽玩，或主動拖起爸媽嘅手，帶爸媽周圍去，就好似咩事都冇發生過一樣。

3. 畀自己鍾意嘅嘢爸媽

自己唔開心，有餅餅食就會開心晒，有啲BB或者會將呢套方式套入喺爸媽身上，所以見到爸媽鬧完自己後，會意識到爸媽唔開心，就會去拎餅餅想請爸媽食（亦有機會係想爸媽打開包裝畀自己食），但無論BB嘅動機係咩都好，爸媽見到BB嘅「善意舉動」，個心都會當堂甜晒，好快又會同BB friend返！

BB嘅所有舉動都係好單純直接，就算爸爸媽媽偶爾忍唔住鬧佢哋都好，佢哋都會記得爸爸媽媽嘅好，亦都會表現出好愛爸爸媽媽。畢竟爸爸媽媽係佢哋唯一依賴嘅對象，所以爸爸媽媽喺管教上都要好好控制自己嘅情緒，當BB聽得明愈嚟愈多說話後，衝口而出嘅傷人話有機會令BB心靈受創，令親子關係惡化。

Text: Mami Editorial

Photo Source： Pinterest