當BB開始嘗試各種食物 爸媽要小心呢10種容易鯁到嘅食物

BB加固之後，可以開始逐步嘗試各種食材，但爸爸媽媽喺呢個時候都要加倍小心，始終嬰幼兒嘅咀嚼同吞嚥能力不及大人，加上佢哋喺食嘢嘅時候容易分心，好易引發起鯁到嘅危機，所以爸爸媽媽要想餵嬰幼兒食以下10種食物嘅時候，要格外小心！

1. 堅果類

花生、核桃、瓜子等堅果類食物，雖然營養價值高，對BB嘅視力同腦力發展有莫大益處，但呢類食物太硬又難咬，嬰幼兒好容易會因為難咬而直接吞食，所以好易會卡住喉嚨的風險。如果想畀幼兒嘗試食堅果類食物，建議可以磨成粉狀煮成糊食用，即使幼兒咀嚼能力唔錯，爸爸媽媽都要喺隔離協助同觀察幼兒進食喔！

2. 啫喱

啫喱表面滑溜，嬰孩好容易未經咀嚼後直接滑到食道，令啫喱卡住喺食道間，造成窒息。爸爸媽媽想餵幼兒食啫喱嘅話，建議要切成細細碎碎，一次餵一小口，隨時注意幼兒吞食啫喱後嘅狀況。

3. 提子

曾經有兩歲女童因吞食提子而發生鯁喉窒息亡嘅意外！提子、荔枝、龍眼等圓形嘅生果本身就好容易喺吞食時滑到食道而鯁到，所以畀BB食呢啲生果之前，請務必要先切成細塊後餵嬰幼兒吃。

4. 湯圓

圓、麻糬、年糕都係黏度較高嘅食物，由於比較難咬爛，所以嬰幼兒好容易會因為咬唔爛而直接吞，結果黐喺喉嚨，非常危險。呢類食物就算切成細塊，對小朋友嚟講都係負擔，所以建議避免嬰幼兒食用。

5. 大肉塊

當BB嘅上下門牙都生出嚟之後，就可以畀BB試食稍微硬一啲嘅肉類，訓練BB用牙齒咬斷食物，但要注意肉一定要切成小塊或薄片，避免BB未完全咬碎就吞入而鯁嚫。

6. 多骨嘅魚

BB多食魚類好處多多，不過媽媽要小心有啲魚嘅魚骨又多又細，有時挑魚骨嘅時候，如果未完全清除乾淨，就好容易卡喺BB嘅喉嚨，所以建議媽媽喺挑選魚類畀BB食嘅時候，應揀啲魚骨較大條（方便媽媽睇到）同較少魚骨嘅魚類，例如鯇魚、三文魚等，亦可以直接買新鮮嘅生魚片煲湯或清蒸。

7. 糖果

當BB食過甜嘅食物後，大部分都會愛上甜味，不過糖果除咗有大量嘅糖分外外，仲有唔少添加物，對BB無益處。加上BB開始識行識走之後，如果口中含住硬糖，有機會將含喺口中嘅硬糖果誤吞而鯁嚫，所以都係少食為妙。而軟糖唔易咬爛，亦可能會令幼兒含喺口中或直接吞下，同樣會造成鯁嚫危險。

8. 爆谷

幼兒好容易將未咬碎嘅爆谷直接吞嚥，而發生爆谷卡喺喉嚨嘅情況。

9. 肉乾

魷魚絲、牛肉乾等纖維較長嘅食品，對嬰幼兒嚟講都係屬於過硬嘅食物，難以吞嚥困難，加上喺加工食品，都應該要少食。

10. 芹菜

多吃蔬菜有益身體健康，但有啲蔬菜嘅纖維特別多，如：芹菜、竹筍等，嬰幼兒好難咬得斷，所以如果要畀佢哋食呢啲蔬菜，應該切細啲、煮耐啲，確保嬰幼兒可以順利吞食。

Text: Mami Editorial