BB出世3日被戒奶 導致20小時無法排尿患大量腎結石

四川有女嬰出世3日就「被戒奶」，爸媽5個月以來都以糌粑餵養BB（糌粑係一種藏族嘅傳統食品，將青稞炒熟後磨成粉，再加水捏成團狀）、牛奶等輔食品，結果導致BB患大量腎結石。

BB送到成都醫院時全身浮腫，已20小時無法排尿，其後醫生幫BB做超聲波，發現BB有腎積水、急性腎功能不全及膿毒血症等症狀，經搶救後，證實有大量腎結石堵塞輸尿管，但手術後BB嘅肌酐值就降低，情況變穩定。

由於事件罕見，醫生認為除非本身有先天疾病，否則好難會出現咁嚴重嘅情況。喺詳問家屬下發現，BB出世3日，爸爸媽媽就開始餵食副食，醫生指係相當唔正確嘅餵養方式，所以會導致BB出現腎結石。

醫生指，對於6個月以內嘅BB，母乳或正規嘅配方奶係唯一合適嘅食物。好多人心急幫BB補鈣，會選擇買鈣片磨成粉狀，溶喺奶粉中然後畀BB食，甚至有家長會自行增加魚肝油劑量，或直接畀BB飲未經處理嘅牛奶，依啲都係唔正確嘅餵養方式。

醫生亦提醒，除非經過確診孩子需要補鈣，否則唔洗擔心BB會缺鈣，若果被診斷需要補鈣，都需要按醫生嘅方式補鈣。

初生BB係消化唔到母乳或初生配方奶外嘅食物，BB胃部容量只有一至兩茶匙（5至10毫升），所以如果餵其他食物，根本令佢哋身體負荷唔到。

對於初生BB，一般每次餵奶通常只需一至安士便足夠。到BB兩個月大時，每日就需要飲大概24至32安士奶，餵哺六至七次，當然唔好唔記得每個BB需要都不同，胃口每一餐都唔一樣。既唔好餵過多，亦唔好餓親佢哋。如果BB嘔奶的話，可以嘗試少吃多餐。

如果父母想斷奶，一般喺8個月至1歲半都係合理嘅斷奶時候，但切記唔可以突然完全斷奶，一定要循序漸進，自然過渡。如果媽媽係餵母乳，BB會更加依賴媽媽，突然斷奶可能會令BB有失落感。

當準備斷奶前，要有意識地減少媽媽同BB相處嘅時間，爸爸可以多啲陪BB玩，減低BB對媽媽嘅依賴，令BB明白爸爸一樣會照顧佢，媽媽都一定會返嚟。

Text：Mami Editorial

Photos：Shutterstock

Sources：四川衛視新聞