日常呢4件事足以引爆媽媽嘅地雷 4句說話將怒火抑壓落嚟

做媽媽之後，經常會覺得情緒大起大落，生活上嘅大小事都會有機會令媽媽好感動，或者神經繃緊到好似下一刻就要爆發一樣。

1.當孩子扭計發脾氣，默唸：

「我生嘅！我生嘅！愛佢！愛佢！」

雖然小朋友有時會好貼心，但有時又會好激心。湊小朋友最令媽媽受挫敗嘅，莫過於難以控制小朋友嘅思想同行為，好多時唔想佢做嘅嘢偏偏要做、想佢做嘅就偏偏唔做，常常激到媽媽扎扎跳。但就算媽媽幾嬲都好，一諗到孩子係自己帶到呢個世界上嘅，自己就要對孩子負責任、付出無限嘅關愛同耐性。

2.當豬隊友幫倒忙，默唸：

「係孩子爸！係孩子爸！原諒佢！原諒佢！」

每個媽媽都希望身邊嗰位係神隊友，但再神嘅隊友總會有失手嘅時候，例如嘈醒好唔容易先氹到瞓著嘅小朋友、自己做到手忙腳亂仲掛著打機⋯⋯令媽媽好多時都忍唔著反晒白眼，恨不得趕呢個隊友出門口。但一諗到呢個畢竟係孩子嘅爸爸，同孩子玩嘅時候可以令媽媽安心做家務，就原諒佢啦！

3.老爺奶奶畀說話聽，默唸：

「要敬老！要敬老！我忍！我忍！」

生兒育女除咗係兩公婆嘅事，更係兩個家庭非常關心嘅事！老人家愛孫係正常不過嘅事，但有時有啲說話難免會觸及到媽媽嘅神經，如：「個孫瘦咗咁多，係咪食唔夠呀？」、「你一抱佢就喊，佢唔鍾意你抱呀！」、「你咁湊唔得㗎！要點點點！」就算媽媽心裡面反駁咗無數次，都要忍住唔講得出口，免得令老公難做之餘，又會畀人再話唔識尊重長輩，唯有忍耐一下，安慰自己又唔係成日見，左耳入右耳出算～

4.當一屋家務等你做又冇人幫手，默唸：

「會完嘅！會完嘅！頂硬上！頂硬上！」

媽媽每日都要同時間競賽，喺每個時段都有一大堆嘢要處理，但當有突發事發生，如小朋友生病／扭計唔肯乖乖進食，媽媽都要花大量精神同時間係氹小朋友上，令其他家務無法如期順利做完。當媽媽發現有手頭上仲有好多工作都未完成，都會有欲哭無淚嘅感覺。但再多嘅工作都會有完結嘅時候，媽媽唯有好好激勵自己重新振作，有咩難倒超人媽媽！？

Text: Mami Editorial