屋企有工人姐姐令旁人羨慕 其實媽媽都會煩惱呢5件事

香港唔少家庭都會聘請工人姐姐幫手湊BB，尤其是兩職家庭。喺旁人眼中，屋企有工人幫手做家務、湊BB可以為爸爸媽媽省卻唔少做家務嘅時間，係一件相當幸福嘅事。事實上，當屋企只有工人姐姐同BB嗰陣，媽媽都少不免會擔心BB同姐姐嘅相處情況，如發現姐姐有做錯嘅地方，亦要小心用詞，避免姐姐心裡不快而請辭或發泄喺BB身上。

1.擔心工人姐姐虐待BB

雙職父母外出工作，屋企只有工人姐姐同BB獨處。喺冇親人看管嘅情況下，加上近日有唔少工人虐待小朋友致死嘅新聞，爸爸媽媽都會擔心工人姐姐究竟有冇好好照顧BB或對BB做出不當嘅行為，所以通常都會喺屋企除廁所以外嘅地方設置鏡頭，方便爸爸媽媽隨時查看BB嘅情況。

2.怕BB鍾意工人姐姐多過自己

工人姐姐變成BB嘅主要照顧者，日對夜對，BB自然會對工人姐姐產生熟悉感，加上見工人姐姐嘅時間仲多過爸爸媽媽，難免會變成鍾意接近工人姐姐多過媽媽。

3. 怕BB太依賴工人姐姐

凡事都有工人姐姐代勞，BB會逐漸形成依賴工人姐姐嘅習慣，對生活上嘅各種自理項目，如：著衫、著鞋、食飯都變得懶惰起嚟，如果冇人幫自己做就寧願唔做，令媽媽擔心BB長大後會難以糾正。

4. 工人姐姐堅持用自己嗰套湊B方式

每個人都有唔同嘅育兒觀同方式，工人姐姐或者喺家鄉都有自己嘅育兒經驗，有時未必會跟從僱主嗰套育兒方式。

5. BB學晒工人姐姐嘅口音

BB喺牙牙學語嘅階段，難免會跟工人姐姐發音，有時發現BB嘅口音似足工人姐姐，令爸爸媽媽哭笑不得。

Text: Mami Editorial