屋企多咗個BB 媽媽唔會任性做嘅6件事

自從做咗媽媽之後，唔再只有自己同老公，好多嘢都要考慮咗BB先，唔可以好似以前咁鍾意點就點。雖然好似犧牲咗啲嘢，但為咗BB絕對值得，好似以下6件事媽媽唔會再隨意做。

1. 亂使錢

未有BB之前錢銀鬆動啲，媽媽可以買自己鍾意嘅嘢，消費冇咩限制。BB出現之後開支大咗，媽媽使錢唔會好似以前咁疏爽，而且寧願留返啲錢買嘢畀BB。

2. 買立雜嘢

為咗佈置屋企，媽媽以前會買唔少擺設，或者按個人喜好買傢具，但有咗BB後，媽媽想留多啲空間擺BB 嘅用品，同埋留番多啲空間畀BB活動，當然唔再隨便買立雜嘢。

3. 啲嘢周圍放

以前返到屋企啲嘢可以隨意放，自己搵得到就得，但BB大啲識得周圍爬，唔可以再將啲嘢亂咁放，尤其係啲細小物品，BB放入口食就弊，亦要留意周圍啲嘢會唔會令BB受傷，擺離BB會接觸到嘅範圍。

4. 瞓到幾點都得

BB嘅出現改變咗媽媽嘅作息時間，媽媽基本上跟住BB嘅時間表生活，BB幾點起身佢就幾點起身，瞓到自然醒、想瞓到幾點都得已經唔可能。

5. 夜歸

諗起有個BB喺屋企等你，媽媽就唔會去街去到咁夜先返，當然亦唔可以好似以前咁想出街就出街，要視乎BB嘅情況、係咪安排到人照顧佢，定帶埋佢出街。

6. 隨時去旅行

未有BB前，媽媽可能好容易計劃去旅行，隨時都可以出發，依家計劃旅行要考慮BB，如果帶埋BB去要準備咩，唔帶BB去又捨唔捨得，有冇人照顧BB。

Text: Mami Editorial