生咗BB之後 媽媽特別容易發嬲嘅4大原因

媽媽有冇發覺自己生咗BB之後，變得容易暴躁，比以前多咗發脾氣。第一個受影響嘅應該係另一半，佢哋都可能話過媽媽「點解你咁容易發嬲」，爸爸們，以下就係媽媽容易發嬲嘅原因！

1. 湊BB唔夠精神

無論全職媽媽、半職媽媽抑或在職媽媽，自從生咗BB之後，為咗湊BB而唔夠瞓，精神唔好心情點會好！仲未計有好多雜事要處理，好似家務、工作，壓力大脾氣都差啲。

2. BB黐到實冇得抖

如果屋企嗰個係黐身B，媽媽更加難抽到時間休息。雖然BB對媽媽依賴，事事都要媽媽唔係壞事，代表BB好鍾意媽媽，但變相媽媽連休息嘅空檔都冇又點「叉電」，唔夠電個人容易忟憎，一大堆負面情緒冇處宣泄。

3. 擔心BB大小事

自從BB出世後，媽媽眼裡只有BB，關乎BB嘅所有事媽媽都好在意：BB唔食奶點算好、點解BB係咁喊、BB幾日冇便便係咪肚仔唔舒服⋯⋯總之BB少少事都觸動媽媽神經，擔憂可以令媽媽一下子發狂。

4. 冇人幫手

只得媽媽一個人湊B或負上最大責任，而另一半冇幫手，甚至愈幫愈忙，媽媽自然唔好過，心情鬱結好難唔發嬲，好多時更會直接向爸爸發火。

Text: Mami Editorial