2歲小朋友踏入第1個反叛期 3個行為令父母大感頭痛

好多小朋友踏入2歲之後，會認知到自己係獨立嘅個體，開始有個人嘅想法，所以喺行為同情緒上都同以前有好大分別，所以2歲呢個關口又被稱為「Trouble 2」（2歲反叛期）。而「Trouble 2」其中一個最令爸爸媽媽頭痛嘅地方，就係小朋友明明2歲前好聽話，但而家就變得咩都要同父母唱反調！

1.最常講嘅就係「唔要」同「唔好」

好多父母反映，小朋友最常喺講嘢嘅時候加上「唔好」、「唔要」兩個字，故意模仿父母嘅語氣，同父母大唱反調；但當面對鍾意嘅事物（如：零食），就講唔出呢啲字眼。

家長可嘗試：

父母平時盡量避免講「唔好」、「唔畀」呢啲字眼，反而用正向嘅句子代替，例如小朋友喺圖書館跑跑跳跳，與其話︰「唔準跑，再跑就返屋企！」不如話 ︰「喺圖書館要安靜呀！」

2. 做父母唔允許嘅事

呢個時期嘅小朋友對所有嘢都會好好奇，咩都想自己試做，而唔想爸爸媽媽代勞，但又唔識分辨咩係危險同自己係咪做得嚟。所以就算父母講咗好多次唔畀做嘅事，2歲小朋友都會好固執咁想去做，證明自己嘅能力之餘，亦想試探爸爸媽媽可以容忍嘅底線。

家長可嘗試：

喺安全情況下，爸爸媽媽不妨放手畀小朋友去嘗試同探索，明白小朋友有時唔係想作對，而係想獨立行事，所以應多作鼓勵。

3. 經常亂發脾氣

2歲嘅小朋友覺得自己長大，所以會想自主去做一啲事；雖然會講嘢，但仍然未可以好好表達自己嘅情緒。所以當自己想做嘅做唔到、當講嘅又表達唔到，好多時就會用哭喊或扔嘢嚟表達自己嘅情緒。爸爸媽媽唔理解小朋友因咩事而唔開心，就會覺得小朋友亂發脾氣。

家長可嘗試：

家長可以用小朋友明白嘅詞彙溝通，替小朋友講出唔開心嘅感覺再表示理解，然後教導小朋友表達呢種情緒嘅正確行為。

Text: Mami Editorial

Photo Source: 香菇愛畫畫@Facebook