媽媽睇到醋意大發 前世情人迷倒爸爸嘅5個行為

「囡囡係爸爸嘅前世情人」，有囡囡嘅媽媽就知道，囡囡天生黐爸爸，爸爸對住囡囡亦係一副冧樣。成日見到老公同呢位「小三」嘅恩愛表現，媽媽都有啲呷醋，好似自己係局外人。前世情人做出以下5個行為，爸爸就招架唔住。

1. 主動錫爸爸

爸爸成日忍唔住要錫吓囡囡，囡囡唔係次次受落，有時都會推開爸爸。不過，當有一次囡囡肯主動錫爸爸，爸爸當然好冧，絕對有初戀嘅感覺。

2. 攬住爸爸

見到爸爸畀囡囡攬住個樣，就知道佢有幾幸福。仲有出街時，爸爸鍾意抱住囡囡，囡囡畀爸爸抱一樣開心，因為抱高啲可以睇到身邊更多嘢，只要爸爸抱起，囡囡又會好自然識得攬住爸爸。

3. 伏喺爸爸心口

囡囡伏喺爸爸心口，傾心事又好，嗲吓爸爸又好，爸爸無任歡迎。如果囡囡伏喺爸爸心口瞓著咗，爸爸郁都唔敢郁，驚整醒個寶貝女。

4. 同爸爸一路玩一路笑

爸爸唔理幾攰都會同囡囡玩，聽到囡囡一路玩一路笑到咔咔聲，佢玩得咁開心，爸爸都跟住開心，而且囡囡嘅笑聲好療癒。

5. 囡囡瞓覺甜樣

爸爸可以靜靜地望住囡囡瞓覺個樣望好耐，見到佢舒舒服服咁瞓覺，咩都唔使做，爸爸已經好滿足。

Text: Mami Editorial

Photo Source: Pinterest