幼兒獨佔所有玩具唔肯同其他小朋友一齊玩爸媽6招教幼兒學識分享

By rachel.lo on 26 Oct 2018

喺幼兒嘅成長過程中，但凡自己想要嘅，家中嘅大人都會無私給予，漸漸幼兒都會學識同爸爸媽媽互動，識得接收同給予大人物品。但當遇到差唔多年紀嘅小朋友，幼兒就失去分享嘅舉動，反而會霸佔自己想要嘅嘢，拒抗畀其他小朋友接觸，令爸爸媽媽頭痛不已！

喺教幼兒分享之前，爸爸媽媽應先了解到幼兒嘅分享能力係取決於佢哋嘅認知，唔同年齡嘅小朋友對分享都會有唔同嘅表現，所以父母應該循序漸進進行引導，唔應該強迫小朋友分享。

通常1歲半前嘅幼兒唔識得點樣同其他小朋友進行互動，所以大多數只會獨自玩玩具，爸爸媽媽唔應該強迫呢個時期嘅小朋友進行分享；而1歲半至3歲嘅幼兒會有較多機會接觸同齡嘅小朋友，偶爾會作出分享行為，或獨佔玩具，爸爸媽媽可適時引導幼兒分享；3歲以上嘅小朋友會逐漸發展出同理心，開始鍾意同其他人一齊玩，會較樂意分享。

想教導幼兒樂於分享，爸爸媽媽可以用以下6個方法：

1.向孩子灌輸所有權

幼兒都係自我中心為主，當見到想要嘅嘢都會意識到係屬於自己，講出「係我嘅！」說話。爸爸媽媽可以平日多啲同幼兒講出物件係屬於邊個，再將物件送到嗰個人嘅手上，慢慢令幼兒意識到原來唔係所有物件都係屬於自己。當幼兒想拎其他人嘅物件時，爸爸媽媽可以出言提醒：「你手上嘅車車係屬於你，但嗰個公仔係屬於姐姐。」

2.請孩子觀察分享行為

幼兒模仿力強，爸爸媽媽平時可以多啲帶小朋友去公園或社區中心，觀察其他小朋友嘅分享行為，多啲讚美同鼓勵小朋友進行分享，如：「你睇下個大姐姐同小弟弟一齊讀故事書，兩個人都好開心呀！」，吸引幼兒嘗試做分享行為。

3.令孩子感受到分享會更快樂

幼兒會認為分享會令自己失去心愛嘅玩具而覺得唔開心，爸爸媽媽可以準備適合一齊玩嘅玩具，如煮飯仔、保齡球等，畀幼兒感受到同大家一齊分享手上嘅玩具，反而會更有趣味、帶嚟更大嘅快樂。

4.輪流玩

當幼兒同其他小朋友都爭奪同一個玩具時，爸爸媽媽不妨教導小朋友輪流玩嘅概念。一開始小朋友們或者會唔肯妥協，堅持要自己玩。呢個時候，爸爸媽媽可以將玩具拎起，表示輪流玩會更快樂，喺小朋友面前示範輪流玩嘅樂趣，吸引小朋友一齊輪候。不過要注意每次玩嘅時段要控制喺短時間內，唔係小朋友會等到唔耐煩而拒絕再輪流玩。