媽媽瘦身大作戰韓國靚媽教你5個正確減肥觀念

By rachel.lo on 12 Oct 2018

生完BB之後，身形就返唔到去之前⋯⋯好多媽媽望住身上陀BB而留下嘅幸福肥肉，都會好懷念未有BB之前嘅纖瘦身形。奈何生完BB之後就要即刻投入湊B活動中，唔好話抽時間做運動，就連去個廁所開大都唔可以用太多時間。不過，韓國就有位媽媽成功喺湊仔嘅同時，塑造出一副美好身材，fit到漏嘅身形真係令人好羨慕！佢仲喺IG上大方分享瘦身觀念，想瘦身嘅媽媽不妨參考下！

1.唔好相信體重嘅數字

Apple Kim指出喺瘦身時不停磅重係冇意思，因為唔少媽媽喺瘦身嘅過程中只靠體重嘅數字去判斷有冇成效，一見到體重增加咗，就覺得冇用而半途而廢。事實上，人體嘅肌肉比脂肪重，Apple Kim亦貼出一張相，對比佢喺52kg嘅肉肉身材同53kg嘅纖瘦身形做比較，證明畀所有媽媽睇，體重數字同身材根本冇直接關係。

2. 可以利用小孩瘦身

小孩並唔係阻住媽媽瘦身嘅障礙，反而係令媽媽變瘦嘅關鍵！Apple Kim會抱住孩子做深蹲，針對減去臀部、大腿等位置嘅脂肪。

亦會同孩子一齊做半空蹲，喺做運動嘅同時亦可以當喺親子活動，一舉兩得！

3. 幾忙都要抽時間做運動

Apple Kim認為媽媽雖然忙，但都未至於完全冇時間做運動，即使只有10分鐘都唔好放棄！佢仲分享話自己湊BB都要湊到最遲11點先有自己嘅時間，可以做下運動。

4.飲食清淡

好多媽媽生完BB就大吃大喝，希望補償返懷孕期嘅冇啖好食，但冇節制嘅飲食只會令身上嘅肥肉愈嚟愈多，亦會帶嚟健康問題。Apple Kim就主張清淡飲食，唔食油膩食物，所以好少會出街食，反而會自己親自落廚，每餐都係少油、少鹽嘅蔬果、雞胸肉、糙米飯為主，佢亦會鑽研用唔同嘅健康食材變換出各式各樣嘅食譜，希望兩個女兒都可以能從小培養出健康飲食嘅習慣。