媽咪袋係湊B好幫手 每個媽咪都會有一個 6點教你揀好實用媽咪袋

媽媽每次要帶BB出街都有大量物品要帶，一個實用嘅媽咪袋絕對係好幫手！雖然媽媽們都想挽住一個有質感又有設計感嘅靚靚手袋出街，做過時尚靚媽！但有經驗嘅媽媽都知道，好多靚手袋都係華而不實，一係唔可以裝晒所有BB要帶出街嘅嘢，一係就質料太重令媽媽揹足大半日後周身酸痛，然後好後悔買咗嚟用！所以各位媽媽喺選購媽咪袋嗰陣，要考慮以下6點：

1.容量大

呢點絕對要優先考慮！BB出街要帶嘅嘢眾多，包括奶樽、奶粉格、紙尿片、保溫壺、玩具、濕紙巾、消毒搓手液、後備衫一套、薄被、換片墊⋯⋯少一樣都足以令媽媽手忙腳亂！一個稱職嘅媽咪袋要裝得落所有BB出街必用品先係合格！

2.雙肩帶

最好選用可以用雙肩帶揹喺後背嘅款式，令媽媽可以隨時騰空雙手抱BB或處理各種事，如想更方便，亦可以選用一啲有多種揹法嘅袋款，適用喺唔同情況。

3.多間隔

令媽媽可以記住唔同隔層係放咩物品，想用嘅時候一打開嗰格就得，唔駛喺同一格剿嚟剿去，節省好多時間，須知道BB喊起上嚟係要即刻滿足佢嘅需要，等多一秒都唔得！而主要嘅大隔層最好係一打開就可以一覽無遺，令媽媽望一眼就即刻拎到需要嘅嘢。

4.輕巧

BB嘅物品已經夠多夠重，媽咪袋本身更唔應該增加媽媽背上嘅負擔，所以質料一定要夠輕！媽媽可選擇輕嘅尼龍質料，避免厚帆布或皮質嘅布料。

5.防水

避免落雨嗰陣會整濕袋入面嘅BB嘢，另外亦可以避免BB喺進食或活動嗰陣整污糟個袋。

6.男女適用

媽咪袋唔係媽媽先可以揹㗎！當爸爸媽媽出街嗰陣，可以互相輪流揹，靈活性更大，所以應該揀一啲男女通用嘅款式。

Text: Mami Editorial

Photo Source: Pinterest