芬蘭政府暖心為每一位新生兒準備驚喜禮物

喺BB出世之前，相信每位爸爸媽媽都會東奔西走，為即將出世嘅BB添置各式各樣生活物品。但係喺芬蘭嘅父母就輕鬆得多喇！因為芬蘭政府會為每一位孕媽媽準備一個非常貼心嘅百寶箱（Pregnancy Box），裡面唔單止有齊哂所有新生兒所需要用到嘅嘢，連孕媽媽嘅需要都關照埋，真係好有愛㗎！

呢啲巨型百寶箱係由芬蘭嘅社會保障機構送出，無論準爸爸媽媽有咩宗教信仰、背景、種族同收入水平都一樣可以收到呢份貼心嘅禮物！

裡面除咗有BB衫、睡袋、可重複使用嘅尿布、沐浴用品、床上用品外，仲有送畀爸爸媽媽嘅禮物，包括胸墊、衛生棉、保險套等。

喺盒嘅底部有一個床墊，可以將盒變成簡單又安全嘅BB床，真係又美觀又實用！

當然，新手父母都可以選擇不要呢啲百寶箱，而換成140歐元嘅現金補貼，不過盒裡面嘅禮物價值遠遠超過140歐元，加上箱裡面嘅BB嘢都比較中性，非常適合每個BB使用，所以好多父母都非常鍾意呢份禮物！

芬蘭政府呢個百寶箱真係父母嘅福音呀！連小編都被佢深深吸引住！如果香港政府都可以送返個百寶箱畀每一位孕媽媽就好喇！

Text: Mami Editorial

Photo Source：Pinterest