BB耳仔入水點算好？ 3個方法輕鬆解決

媽媽幫BB沖涼洗頭嘅時候，有時會唔小心令BB嘅耳仔入水，呢個時候，媽媽可能會用棉花棒去挖BB嘅耳仔，嘗試將積水帶出嚟，但原來呢個做法係大錯特錯！因為棉花棒深入耳朵有機會整傷耳膜，造成耳膜破損，反而令積水更深入耳膜形成中耳炎，後患無窮！其實，媽媽可以用下面3個方法輕鬆幫BB清理耳內嘅水。

1.輕扯耳仔

媽媽可先將BB打側身瞓喺自己嘅大脾上，用手輕輕拉扯BB嘅耳仔，等水自然流出。

2.紗巾索水

用紗巾一角卷成幼條狀，輕輕放入BB耳內，但唔好太深入，睇下可唔可以將水索出嚟。

3.風筒吹乾

水喺耳內會因為表面張力而卡住，用風筒吹耳仔可以令水嘅張力變弱而流出，而熱風亦可將水分自然蒸發。但要記得將風筒調校到最低熱力，而且要同耳仔保持大約15cm嘅距離。

如果上述方法都解決唔到BB耳仔入水嘅問題，而情況又持續2日嘅話，媽媽就需要帶BB睇醫生喇！

Text: Mami Editorial