【小朋友要返學喇！但又好唔慣媽媽唔喺身邊 有助幼兒克服分離焦慮的4本繪本】

好彩佢好鍾意返學，老師話佢好快已經適應咗：）

我依然每日都同佢睇呢四本書，同大家分享一下。

第一本：《我要去幼稚園》

以搞笑形式講返幼稚園有咩做，描述小朋友初頭唔想返學，中間知道返學原來好有趣，到最後有一班超人走出嚟話「我哋要去幼稚園」！我每次跟超人做手勢，加誇張啲講我哋要返學呀！唯b都笑得好開心，而家朝早會同我講一次「我要返學呀！」

值得買嘅原因：

• 繪圖好靚，顏色鮮豔好吸引
• 俾小朋友知道佢哋嘅憂慮大人係理解嘅，但返學其實並唔可怕，有好多好玩嘅活動：唱歌、聽故事，仲好多小朋友一齊玩
• 可以同小朋友預告同重溫返學嘅情景，令佢哋快啲熟悉返學嘅日常事

第二本：《媽媽很快就會來接我》

值得買嘅原因：

• 以圖畫帶出小朋友嘅分離焦慮症，好寫實
• 道出小朋友返學時嘅內心世界
• 提早講到俾小朋友聽，佢哋嘅憂慮係成立嘅，但媽媽應承咗就一定會嚟接，可以放心去同朋友仔玩

第三本：《媽媽上班的時候會想我嗎？》

小朋友大個咗可能會問「媽咪有冇掛住我呀？」，呢本書正正係同小朋友講媽媽上班時掛念佢嘅心情， 等小朋友都知道雖然媽媽唔喺身邊，但心中有佢。

值得買嘅原因：

• 由媽媽同小朋友起身，送返學，返緊工嘅時候，到放工返去陪小朋友，好寫實，媽媽嘅心聲都表達得好細緻。
• 唔只係俾小朋友睇，都有帶俾大人嘅訊息。睇完好感慨，會諗如果唯b問我「媽媽，你可以唔返工陪我嗎？」，我應該點回應呢？同時會不停思考究竟做working mom對佢有咩（好/壞）影響呢？
• 讓媽媽停下急速嘅腳步，諗下平時同小朋友嘅步伐係咪真係一致？

第四本：《兒童生活自理互動遊戲書》

呢本書唔只同返學有關，同日常生活都息息相關。個人認為自理能力同知識一樣緊要，唔可以做個有知識但不能照顧自己嘅人，所以從小訓練唯b自己的事自己做。本書從著衫、返學、過馬路、去公園玩等常見情境教小朋友應該做嘅事。喺返學呢兩版仲有正確同錯誤嘅示範，小朋友郁吓啲小機關就會分辨到應該同唔應該做嘅事喇。

值得買嘅原因：

• 俾小朋友認識唔同情境要守嘅規矩
• 有得互動，揭吓轉吓，玩住嚟學習
• 頁尾/頁底情境會出現嘅物件，叫小朋友搵返出嚟，加深印象同提升觀察力

希望各位小朋友返學開開心心！

如有興趣看更多自理寶寶的育成和BLW的分享，歡迎按此到我們的Facebook Page：）

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：唯媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！