【每朝叫小朋友起身 都要勞氣一輪 2個方法等你唔使再同時間競賽】

小孩開始幼稚園生活後，每天晨早起身都好似同時間競賽——首先而搞好自己儀容及出門返工嘅準備，然後就要為阿女起身作準備。準備好，就來到「戲肉」階段——阿女終於醒咗啦！

佢醒咗，時間就開始變咗唔係自己可以控制；看著手錶支秒針係咁行，而佢就好似被撳咗Slow Motion個掣時，「快啲啦！」就好容易衝口而出。可是，好多時父母會係呢個戰場「敗下陣來」，原因好簡單——無人可以鬥得贏時間。

「唔好意思，我個女佢起床遲咗，刷牙洗臉又慢咗啲，所以我返工遲咗！」呢段說話，筆者相信唔係咁多打工仔父母「夠薑」講出口，亦唔係咁多老細胸襟大到聽得入耳。

於是，因為時限嘅壓力，父母一係就催個小朋友直到發火，唔係就忍唔住手幫佢做埋就算；但係這兩個結局都唔係父母最希望見到的。

其實小孩對時間緊迫嘅概念好模糊，你叫佢快啲，佢未必了點解要咁快；上網睇番，發現原來不少父母都面對相同問題。其中一個解決方法係自己同小孩都早一點起床，有更多時間去作出門準備，而筆者則因為小女由上午校轉到下午校，而少了晨早就要匆匆忙忙的生活，亦減少了有衝突的機會。

而另外一個解決方法，就係以時序列出早上小孩必要做的幾件事，避免對小孩每事催促，反而問他已做到邊個步驟，使小孩自己有機會採取主動去完成某些「晨早」任務！

其實，小孩子優閒慢活並不是錯事，就算是大人亦會因為過份匆忙而有壓力，有時你希望加快小孩的步伐去配合自己的生活節奏，但站在小孩的角度，他可能都希望父母們可以減慢步伐去配合他們的生活節奏吧！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : Scientific Papa

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！