【雙職家庭】港媽月入7萬常OT難湊小朋友扎掙應否減3萬轉新工？

mami熱話親子新聞

By Dara on 16 Mar 2024

Deputy Managing Editor

對於雙職家庭來說，照顧小朋友之餘又要兼顧工作不是一件容易事。近日有港媽因工時長，即使本身有一份高薪厚職，仍扎掙應否減薪轉去一份準時放工的職位，由於猶豫不決，於是上網問大家意見。

Photo from MamiDaily

想放棄7萬月薪

港媽在社交專頁「奴工處」發帖，指自己目前月薪連津貼有近7萬元，但工時長、壓力大，每朝早上8時半上班，每星期卻有三天需要加班至晚上7時，而且全年有指定日子和月份不可以放假。

她自覺現時工作難兼顧家庭，考慮放棄高薪厚職，轉去另一份人工較低但準時放工的職位，她說：「諗緊轉唔轉去另一份人工約四萬嘅工，每日準時朝9晚6，方便照顧小朋友。」由於難以抉擇，於是上網詢問網友意見。

Photo from MamiDaily

減薪不代表準時收工

帖文引來網民兩極意見，有一批人反對她轉工，因為在香港很難找到沒有壓力的工作，老闆亦習慣壓榨員工，即使轉去四萬元的職位也不一定能準時收工。「邊有一份工可以擔保唔使加班？可以準時收工？」、「要適應搵7萬轉為四萬，都不容易，萬一新工不似預期，千萬不要後悔」、「有幾多人天真嬌覺得interview 講無乜OT就真係唔使OT？」

Photo from MamiDaily

將來難找回高薪職位

有人提醒，薪金相差3萬元不是小數目，需衡量日常生活開支能否應付，而且之後想找回7萬元人工的職位並不容易，「應該要諗下搵少3萬大唔大影響」、「轉咗4萬好難上返7萬，每個月差3萬喎」，建議港媽應與另一半協調湊小朋友的時間，「唔轉，同另一半協調你ot個陣咪佢照顧多啲小朋友，反之亦然。一轉低咗到小朋友大咗，想再繼續發展職涯就會艱難啲」。

網民覺得港媽人工如此高，即使請一、兩個外傭分擔照顧孩子和處理家務也綽綽有餘，沒必要減薪。「你而加人工有7萬，唔係萬7喎！夠錢請番個工人姐姐去照顧小朋友啦！」

Photo from MamiDaily

最好可以work-life balance

另一方面，有不少人支持港媽轉工，「輕鬆點、又都有四萬、為小朋友同自己健康、都轉得過」、「身體，家人最緊要。條數計得掂，梗係work life balance，尤其你需要時間照顧小朋友」、「我會揀家庭相處時間，小朋友成長過咗就過咗，錢隨時可以揾番，大把人放棄高薪厚職全力照顧小朋友」

Photo from MamiDaily

被指曬命post

帖文亦被人指是「曬命post」，無論7萬元還是4萬元，本地不少人遠遠未有這個數目的工資。「我同我D朋友睇完呢個post，都覺得好大壓力，因為我哋返咗咁多年工，仲要係80後人到中年，人工都係得1萬3到1萬5，想買個家都無能力，想比多D錢父母養老都無能為力，真係覺得自己好無用，樓主，你唔好比壓力我哋啦！我哋自卑感太強啦！」、「我都認自己太廢，無能力搵人工高嘅工」、「有幾多香港人朝9晚11都無40k啊老友」。