download MamiDaily 親子日常 app
【親子好去處】一家四口$200全年任玩濕地公園  闖巨型樹屋 探貝貝 紅樹林浮橋

【親子好去處】一家四口$200全年任玩濕地公園 闖巨型樹屋 探貝貝 紅樹林浮橋

親子好去處 爸媽分享

開返啦開返啦!咁去邊度好呢?心願實在太多,心大心細之下就去咗呢個集郊外生態遊+樹屋滑梯+室內餐廳+展覽於一身的天水圍濕地公園啦! (係咪好有學生時代感覺呢!)話晒都係政府場地,所以配套設施會比較好,場內有訪客中心停車場及後備停車場(時租只需要$8)。而且很重要的一點,就係會有比較乾淨的廁所(帶住3個小朋友感覺十分良好),仲有洗手設施,啱晒經常要洗手洗手洗手的我們。(臨上車先都可以洗乾淨對手)

大家一齊洗洗手Photo from 浠姐、小肥滺與金仔

◎門票

收費十分抵玩,成人$30,小童$15(3歲以下免費)。而且仲有半年及全年費,現時仲有家庭套票優惠,一家四口只需$200就可以有全年任玩。基於玩3次已經回本,秋冬嚟就更加舒服,所以我哋就整咗個全年證啦!

首先可以問職員拎份表格,再填上一家四口個人資料 (要記得小朋友身份證呀!),最後一步就係影相 (如下圖爸爸咁),即場影相即場做證。

一家四口只需$200就可以有全年任玩Photo from 浠姐、小肥滺與金仔

◎生態迷宮

生態迷宮帶領訪客前往景色怡人的綠化屋頂。訪客需要解答一些關於濕地生態的問題,才能找到迷宮的出口。
因目標明確關係,大家都係跑咗2圈就離開,下次去要再玩!

生態迷宮Photo from 浠姐、小肥滺與金仔

景色怡人,環境又闊落Photo from 浠姐、小肥滺與金仔

好大片草地讓小朋友盡情跑Photo from 浠姐、小肥滺與金仔

◎立體錯視藝術

這幅令人難忘的錯視藝術畫作展示了濕地環境和多種濕地動植物,讓訪客在展開濕地之旅前,可先體驗濕地美態。
基本係入門第一個打卡位。

立體錯視藝術Photo from 浠姐、小肥滺與金仔

入閘後就到達有冷氣的大堂 (實在太舒服了!!)大堂光線充足,樓底十分高,因而唔會覺得壓迫感。大堂內有禮品店、各個lego模型,行得十分舒服。

大堂光線充足Photo from 浠姐、小肥滺與金仔

有冷氣十分舒服Photo from 浠姐、小肥滺與金仔

樓底十分高Photo from 浠姐、小肥滺與金仔

大堂再向入走,會有唔少主題展覽室,又因為目標明確關係,所以今次未有多加參觀,就直奔主題。

◎沼澤歷奇

如果小朋友嚟講,當然就係以沼澤森林為主題的室內兒童遊樂區——沼澤歷奇最吸引啦!真係未出發先尖叫。(媽媽其實都好鍾意,因為有冷氣!)
歷奇樹屋十分有睇頭,因為限高150CM小朋友,所以媽媽我未能上去參觀,但就咁睇都覺得好玩。四通八達,有多條不同形狀滑梯都夠吸睛,基本上15分鐘轉眼就過。

沼澤歷奇,有可愛的傳聲筒Photo from 浠姐、小肥滺與金仔

以沼澤森林為主題Photo from 浠姐、小肥滺與金仔

 

入去前記得睇清楚規則,以免到時失望而回啦!

為配合防疫措施,兒童須持有有效的「沼澤歷奇入場證」才可進入「沼澤歷奇」,以控制場內人數。為平均分配名額,職員只會向每位親身輪候的兒童派發一張入場證,其他人士不能代為領取。

以下是開放時段及入場證派發時間:

時間表Photo from 浠姐、小肥滺與金仔

使用規則

  • 入場證數量有限,先到先得,派完即止。
  • 每節時間為15分鐘。
  • 每節參與人數最多為20位兒童(每位兒童須由最多一位成人陪同)。
  • 使用主遊樂設施(樹屋)兒童身高須為100至150厘米。100厘米以下兒童只可使用幼兒遊樂區。
  • 所有入場人士必須脫鞋及穿著潔淨襪子。
  • 每節開放時間結束時,所有使用者必須離場以便進行場地清潔。

幼兒遊樂區如下: (只有相中咁多,相比起嚟就唔太吸引,幼兒家長要留意啦~)

幼兒遊樂區Photo from 浠姐、小肥滺與金仔

當日可能平日的關係,所以人數唔算多,15分鐘當然唔夠玩,所以玩完第一次後我哋就先去隔離個餐廳醫一醫肚先。食完再去拎最尾一場(4:30PM)的籌,中間時間就去行下濕地公園。

◎餐廳

因為限聚改為四人一檯,所以我哋就決定係呢度用餐補充下體力先。而至於餐廳呢,以郊外嚟講食物種類選擇都算多,而且價錢十分合理!重點係對住個一望無際的郊外美景,雖然檯櫈有啲老土,衛生亦未算最好,但已經令人心擴神怡。

餐廳美景Photo from 浠姐、小肥滺與金仔

補充電力Photo from 浠姐、小肥滺與金仔

餐牌Photo from 浠姐、小肥滺與金仔

跟餐仲可以加$15有Movenpick雪糕一杯,真係好抵呀!!! (平時減價都要廿幾蚊)

Movenpick雪糕Photo from 浠姐、小肥滺與金仔

雪糕好抵食Photo from 浠姐、小肥滺與金仔

◎濕地快拍

公園的餐廳附近設有「濕地快拍」遊戲,讓訪客與黑臉琵鷺、彈塗魚和各種濕地明星合照留念。

呢部機都有啲歷史,所以解像度真係麻麻 (嚟緊會更新,應該會更換)

濕地快拍Photo from 浠姐、小肥滺與金仔

解像度一般Photo from 浠姐、小肥滺與金仔

走廊的有趣紙展品

趣紙展品Photo from 浠姐、小肥滺與金仔

◎貝貝之家

嚟到濕地公園當然唔少得嚟見下貝貝啦,比佢哋認識下小灣鱷。

之後正式出發濕地公園。

貝貝之家Photo from 浠姐、小肥滺與金仔

認識小灣鱷Photo from 浠姐、小肥滺與金仔

◎溪畔漫遊徑

河溪是許多生物的家,這裡會為你介紹不同河段的特色。

溪畔漫遊徑Photo from 浠姐、小肥滺與金仔

環境很寫意Photo from 浠姐、小肥滺與金仔

到戶外走走心情暢快

濕地探索中心

生趣軒和水文軒是戶外教室,以便研習溪流和水潭的生物,訪客亦可參與導賞活動認識濕地的動植物,以及了解濕地對人類日常生活的重要性。

濕地探索中心Photo from 浠姐、小肥滺與金仔

◎演替之路

水生植物的生長可改變濕地的生境,該過程稱為演替。

演替之路Photo from 浠姐、小肥滺與金仔

水生植物Photo from 浠姐、小肥滺與金仔

這天天氣十分好Photo from 浠姐、小肥滺與金仔

◎紅樹林浮橋

處身於浮橋之上,可領會融入紅樹林的感覺。看看在這裡生活的動植物所具備的驚人適應能力。近距離觀察四種紅樹的不同部位,可見其特殊的支柱根、胚軸、膝根、和鹽腺。
(其實我哋無行到,只不過媽媽我好鍾意種感覺,所以入去影咗幾張相。)

打卡位Photo from 浠姐、小肥滺與金仔

紅樹林浮橋Photo from 浠姐、小肥滺與金仔

◎觀鳥屋

濕地保育區有三間觀鳥屋 (河畔觀鳥屋、魚塘觀鳥屋、泥灘觀鳥屋),讓訪客近距離觀察多種生態環境和野生動物。每間觀鳥屋均裝設單筒望遠鏡及觀鳥圖鑑,方便觀察。 (望遠鏡暫停開放)

觀鳥屋Photo from 浠姐、小肥滺與金仔

後記:

其實今次嚟係非常有目的性 (玩沼澤歷奇),所以後半部份的公園其實都無行。再加上行之前亦無做功課,所以對小朋友亦無過多講解(知識有限,哈哈),不過打完呢篇blog後真的長知識了,下次可以再解釋下比佢哋知道,課堂不一定在班房。
雖然入夏未必會想成日曬,但仲有秋冬,所以買年票真係超值!! (當然買一次票亦都十分抵)

畢竟每個人喜好都唔一樣,如果怕曬怕多昆蟲要有活動多姿多彩的朋友,可以自行忽視呢個地方。
最後一句就係,有得奔跑真好!!如果可以唔戴口罩更好!!(期待)

有得奔跑真好Photo from 浠姐、小肥滺與金仔

天水圍 濕地公園

https://www.wetlandpark.gov.hk/tc/information/transport-driving
交通:
◎香港濕地公園停車場
有訪客中心停車場及後備停車場
收費:每小時8元
開放時間: 早上九時至下午五時半 (最後入閘下午五時))
如果2個車場已滿,亦可以停泊附近屋邨停車場

◎港鐵(屯馬線及輕鐵)
乘搭屯馬線於天水圍站轉乘輕鐵705路線,於天秀站(經隧道)或濕地公園站(經天橋)到香港濕地公園。
◎途經濕地公園的巴士/小巴路線

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道