download MamiDaily 親子日常 app
【街頭傷人】屯門少年突用水樽打兒子頭部見血 港媽知對方有隱情放生遭網民狠批

【街頭傷人】屯門少年突用水樽打兒子頭部見血 港媽知對方有隱情放生遭網民狠批

mami熱話 親子新聞
By Louisa on 07 Apr 2022
Digital Editor

公眾地方人來人往,小朋友體型弱小容易受傷,更可能被當作襲擊對象!屯門日前發生街頭傷人事件,一名港媽在網上分享事發經過,稱其年幼兒子突然遭到一名身材高大的少年用水樽打頭見血。其後報警處理,港媽發現對方患有自閉症,因此最終決定不再追究,惟做法卻被網民批評姑息養奸。

港媽日前帶子女到屯門市中心閒逛,兒子突然受襲。Photo from Google Map

兒子突在街上被打

該名港媽日前在Facebook專頁「家長 Secrets」投稿,表示自己日前帶著年幼子女到屯門市中心閒逛,期間聽到有人在遠處大叫「你做乜打人呀?」她和子女行經時,有一名身高約178厘米的黑衣少年,突然「執起水樽車落我個仔到」。港媽見狀大驚高呼「你做咩打我個仔呀?」,之後便發現原來該少年在早5分鐘前,已曾用腳踢另一名3歲小朋友。

施襲者稱小朋友「阻住地球轉」

據照片可見,兒子被襲後額頭出現瘀傷並見血,她在查看兒子傷勢後便質問對方為何要打小朋友,少年便回答說:「佢哋冇用架,生出來係阻住地球轉,見到佢哋就憎!」港媽估計少年的家長平日就是灌輸這種想法給他,故追問「你屋企人呢?爸爸媽媽呢?」不料對方突然情緒激動跪地求饒:「你放過我啦!」

兒子被少年用水樽打頭受傷。Photo from 翻攝自「家長 Secrets」Facebook

港媽得知對方患病不追究

未幾警察到場,簡單詢問事發經過、登記個人資料,並檢視小朋友的傷勢。警員問港媽:「你哋會唔會考慮告佢,會嘅話我哋可以拉佢」,她便回答說不會,但擔心少年會再次傷害其他小朋友。警員就表示「佢係有問題」,因此會「帶佢睇醫生」,期間港媽無意中聽到少年稱自己患有自閉症。最後警員再次問港媽會否提告,她堅定說不會,事件就此結束。

港媽知少年患自閉症,於是便決定不追究。Photo from 翻攝自「家長 Secrets」Facebook

希望港人多一點愛心

港媽希望藉分享此事,呼籲大家若遇上這類病人,應給予「多一倍嘅愛同關心」。她自言自己不是天使,眼見兒子受傷也很心痛,不過她認為「照顧患病嘅小朋友好辛苦」,所幸少年今次遇上的是她,否則「我怕他日遇到其他人,被玩呢,點算?」所以港媽希望各位「香港人畀多一份愛,多一份包容,世界會更美好」。

兒子被打後,額頭出現瘀傷。Photo from 翻攝自「家長 Secrets」Facebook

做法遭網民狠批

不過網民卻不太認同港媽的做法,認為雖然她的出發點是好,但這樣做很大機會令更多小朋友受傷,「其實你有無諗過你今次放過佢,可能警察落完簿就算?如果拉咗,會唔會可以處理得好啲,例如法庭轉介佢住宿舍或者有更好的精神治療?今次好彩打傷人就無後果,下次打得仲嚴重咁點算?一時聖母心,隨時累埋街上其他人(我小朋友都試過無啦啦俾人打,好後悔無追究!)」

縱容或致再有小朋友受傷

大部分網民都不贊同放生少年是處理問題的好方法,「樓主嘅大愛實在令人佩服!但係如果下次佢再順手執起第二啲嘢打小朋友呢?」、「你唔告佢,警察就會銷案,下一個受害者未必咁少事」、「唔好攞自閉症、SEN呢類病做藉口,放任小朋友唔教,嚟傷害正常嘅小朋友,包容唔係咁攞嚟用」、「其實佢咁大個,殺傷力可以好大,如果佢打既係bb可以好嚴重。告佢先可以真正幫到件事」。

Text:Mami Editorial
內容由 家長 Secrets 授權轉載

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道