download MamiDaily 親子日常 app
【媽媽心聲】帶住小朋友嘅媽媽比較好恰嗎?  媽媽們要團結起來,在外要互相幫助!

【媽媽心聲】帶住小朋友嘅媽媽比較好恰嗎? 媽媽們要團結起來,在外要互相幫助!

爸媽分享
By 龍鳯孖媽 on 18 Oct 2021

最近遇上兩件事令我覺得有點唔開心和嬲。有部份人總愛難為「媽媽」,也許帶着孩子的母親看來好似比較「好恰」。剛剛星期六,出完街,帶住小朋友搭shuttle bus 返屋企。咁啱我哋最後四個可以上到shuttle bus ,但因為最後上車,所以我同囡囡要分開坐。得返前座後座,於是我叫囡囡坐後面,提她快快自己扣好安全帶。(她坐後座係因為佢先上車,走廊好窄。好難再調位。而且唔快快坐好,車就開唔到,有可能會有人罵。)

有部份人總愛難為「媽媽」,也許帶着孩子的母親看來好似比較「好恰」。

被乘客指責不幫女兒扣安全帶

當時因為我唔可以坐喺佢隔離,所以我唯一可以做嘅就係叫佢自己快快扣好安全帶以確保佢嘅安全。當然我叫佢扣之餘,都會留意返佢自己扣唔扣到~

依家shuttle bus,我哋已經搭咗一個月。每一次佢都係自己扣好安全帶!當然如果我想幫佢扣,佢都唔俾,其實小朋友有d嘢自己做到,佢會想自己做!

此刻,坐前座嘅良善大叔見到原來我同囡囡分開咗,主動提出交換座位令我同囡囡可以一齊坐。世上總有不計較樂於助人的人 ~

當我同囡囡坐好後,本來坐囡囡隔離嘅後座大嬸說:「搞錯呀~要個細路自己扣安全帶!」(好唔禮貌嘅語氣)

我雖然心裡好嬲,無端被罵,但我仍溫柔地說: 「佢自己識得扣。」(面掛笑容,雖然戴住口罩睇唔到,但語調溫柔,雖然心裡……)

嬸嬸細細聲唔知講乜以示不滿。

我今次有少少惡: 「你講乜嘢呀?」

嬸嬸說:「冇嘢喇..」(今次唔敢再惡,可能知道我唔係咁好蝦)

之後我叫阿囡扣好安全帶,讚囡囡叻叻,一向都係自己會扣好。

其實搭校車都係自己扣,都快5歲了~你話我叫個一兩歲嘅自己扣就話有問題...

有時囡囡扭眼瞓時,會做D奇怪嘢,試過幫個書包同麵包扣安全帶。(當然當時架車有好多空位)

問題重點唔係阿囡自己識唔識扣安全帶,係路人第一句就批鬥娘親。

 

女人何苦為難女人

如果幫佢扣,可能又會被人話,咁大個都要阿媽幫手扣。

做人阿媽好似做乜都係錯>.<

問題重點唔係阿囡自己識唔識扣安全帶,係路人第一句就批鬥娘親。

如果路人係出於關心小朋友嘅安全,怕佢自己唔識扣,係咪可以問小朋友自己扣唔扣到,使唔使幫手呀?又或者提出調位幫一幫我哋。

絶對唔係話佢唔調位唔啱,問題在於佢嘅態度!

路人請自重 ,關心和挑剔只是一線之差。

有時出街,天氣涼咗,路人都會善意提點要幫小朋友著多件衫。

其實善意嘅提點,當媽嘅都會接受。

相信當媽的喺沒有做過傷害或影響他人嘅事情下,被路人責怪,當然氣上心頭。

總是不明白當女人的為何要為難女人?

 

被路人嫌棄阻路

之前喺重陽節假期,我哋去咗黃金海岸玩,又遇到另一單女人為難女人嘅事。

我帶咗孖寶去廁所,隊友叫我哋去完去7-11搵佢。

於是我哋去完就入去搵隊友,一個拖住兩個入去望咗兩眼。

唔見隊友諗住走,發現有一家四口想過條路,我即刻拉埋兩個小朋友去一邊,讓條路出嚟,我同時亦say sorry。

個女人同佢老公每一拖住一個比孖寶年長嘅小朋友行過,附送一聲 :「喳」(以示不滿) 以代替「唔該哂」。

其實我最多阻佢2秒,我見到已即時讓路,仲道埋歉。

有些人總覺得全世界圍著他轉~

佢阻人就得,人阻佢就唔得~

我唔信佢成世人每分每秒都未試過阻到人~

人總要經歷生老病死,總會遇到脆弱嘅一刻。

身體健全唔係必要,好彩嘅我哋有健全嘅四肢。

每個人都會老,難道嫌人阻住你嘅人唔會變老嗎?

(請別人) 將心比己

(請自己) 別太難過

沒法管好別人的嘴巴

只好管好自己的內心

當媽的,希望我哋假若有緣喺街碰上,大家都能互相幫助,團結起來!!

當媽的,希望我哋假若有緣喺街碰上,大家都能互相幫助,團結起來!!

有時我會諗,以上情況,如果換成「大隻佬」,那些女人係咪唔敢出聲?

睇嚟我要操大隻D???

不過其實我好惡架,唔好得罪我…哈哈~

 

Text & Photo : 龍鳯孖媽

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道