download MamiDaily 親子日常 app
【親子好去處】美利樓+海邊走走+帆船遊樂場 赤柱深度遊走勻11個景點

【親子好去處】美利樓+海邊走走+帆船遊樂場 赤柱深度遊走勻11個景點

親子好去處 爸媽分享 bloggers
By 龍鳯孖媽 on 23 May 2021

這天我們到海邊走走。其實本來諗住行山,但最近天氣炎熱,睇嚟要提早結束山季。諗咗一陣,決定去充滿歐陸色彩嘅赤柱,相信冇人未去過。由十幾年前同豬隊友拍拖嚟到陀住孖寶大住個肚嚟,再到孖寶一歲多時嚟過,都有唔同玩法。今次佢哋已經四歲,可以玩到仲多野。

第一站~~赤柱市場道

條小巷有幅充滿童真嘅畫可以影吓相(不過小心馬路上嘅車)。

另外,過咗體育館,行多陣,右邊有條樓梯,上面有個好小型嘅遊樂場。果遊樂場得滑梯同過三關(啱d小bb玩),但勝在隠世(google map好似找不到),同埋有樹蔭。我哋包場玩咗陣。

第二站~~帆船遊樂場

以前拍拖或大肚時都唔覺有個咁好玩嘅遊樂場。
做咗阿媽之後,個心態真係唔同咗,留意嘅嘢又唔同。
豬隊友話我哋拍拖嘅年代已經有依個遊樂場,但我真係又唔覺喎。
其實有冇人知個遊樂場幾時起架?
帆船遊樂場造型非常吸睛!遊樂場位於赤柱廣場對出嘅空地。



成艘船俾小朋友玩,有得揸船、溜滑梯、爬繩網等等。









不過地點較曬,喺船底行行走走又係一個唔錯嘅活動。

第三站~~赤柱天后廟和「同昌大押」石柱群

赤柱天后廟係香港南區歷史最悠久嘅一所天后廟。

赤柱「同昌大押」石柱群,來自油麻地上海街,喺重建項目中拆下,之後送到赤柱美利樓旁重置。

第四站~~~美利樓和卜公碼頭

美利樓揉合中式同西式嘅建築設計,採用了西式嘅圓柱配上中式嘅瓦頂,富有維多利亞時期色彩。



卜公碼頭名稱來自香港第十二任香港總督卜力,有提供船隻前往蒲台島。


第三同第四站都係順打吓卡,四周逛逛吧~

第五站~~海邊餐廰

雖然天氣炎熱,但近海邊,吹吹海風,非常暢快~

飲番杯cocktail,當自己係泰國渡假又不錯~

第六站~~赤柱廣場

去超市買d野食準備喺沙灘tea~
順便係燈籠下打卡~

同阿囡講係長髮公主嘅天燈,小朋友特別開心。

第七站~~赤柱海濱長廊

除咗海風和海景,仲見到好靚嘅大紅花,有紅色、粉紅色同黃色,色彩鮮艷。


第八站~~赤柱後灘

其實可以揀去正灘,但一向都只去後灘,貪佢地方細細,冇乜人,又有大樹遮蔭。




如果不游水,只堆沙,其實都係一個唔錯嘅選擇。
(雖然d沙較粗)

第九站~~水僊古廟

建於乾隆年間,建於海灣嘅礁石上,亦要上樓梯前往,有d似一座古城堡。


小朋友又會幻想為公主嘅堡壘。

第十站~~礁石

有邊個拍拖時未行過呢?

今次第一次帶小朋友行,所以唔好行咁出,亦要注意安全。



小朋友覺得好有趣,係一個新嘅體驗。

第十一站~~赤柱市集

售賣一些具本土文化或一些新奇嘅物品,帶小朋友開開眼界。

其實仲可以繼續玩。
仲有個圖書館,可以入去過冷河和睇圖書。
巴士站附近有個赤柱灘道遊樂場,又可以再放電。
想游水,可以去赤柱正灘。
不過已經玩咗大半日,所以決定搭車返屋企,下次再玩~

~後記~

雖然當日氣溫幾高,但因有海風,又有商場過冷河,唔算太熱,所以帶住小朋友玩足一日也冇問題。
延伸閱讀:
【親子好去處】洪聖古廟睇貓+坐街渡+逛海鮮市場 感受香港仔懷舊漁港風味

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道