【母乳記錄】人奶路走到一歲check point

相信好多媽媽都希望以母乳餵哺小孩，而我亦不例外，一直堅持母乳餵哺。即使寶寶出世後有黃膽，持續至出生後3個月才退黃，我都堅持以全母乳餵哺。幸好得到公司嘅配合，我可以休假至胡小姐8個月才復工，否則全人奶路，唔會咁順利。

我諗我算係富媽媽，曾經打爆過成個冰格

冰奶多到整壞咗個雪櫃

雖然冰過嘅人奶，營養價值不及新鮮人奶

但冰奶嘅成份及營養，一定點都好過奶粉

為免日後復工，奶量減少

因此，即使我知道冰奶營養不夠好

我都仍然儲存大量冰奶作儲備

好彩寶寶乜奶(埋身、奶樽、冰奶、雪奶)都肯食

係個合作嘅乖寶寶，一滴奶都無曬

亦無百費媽媽嘅心機

Day 1 到現在，我嘅人奶路尚算順利

無經歷過塞奶、石頭胸、乳線炎等狀況

當然，當中仍有不少辛酸血淚，在此就不提啦

由寶寶2個月開始，至我復工前

每晚臨瞓前都會用奶樽食母乳

而我就會用奶泵泵奶 (每日最少泵一次)

其餘時間，寶寶都係埋身食

一來可以訓練寶寶用奶樽食奶

二來我嘅身體亦可以適應用奶泵泵奶

為日後復工作準備

＊因為長期埋身，身體唔適應，有機會唔受泵

所以我每日至少會用奶泵泵一次＊

泵奶過程亦好順利，每次單邊都有 7 oz以上

最高紀錄試過單邊
10 oz (1枝大奶樽都裝唔晒)

每次泵奶見到自己嘅奶量，都好安慰

好安慰自己有足夠嘅奶水，能夠提供足夠嘅營養比寶寶

亦覺得自己一直以來嘅堅持係值得嘅

自復工後，如我所料，奶量漸漸減少

冰格嘅存貨，已被寶寶清空

初期復工授訓，奶量由雙邊 8 oz跌至6 oz

其後因為體重激跌10磅，令奶量由雙邊 6 oz跌至3 oz

現在就只剩餘雙邊 2 oz

起初見到奶量不斷下跌

心情超down，極度depressed

但仔細想，當時寶寶已經11個半月

全人奶路走到11個半月已經好叻

補奶粉也並不是一件壞事

因此購買咗第一罐奶粉比寶寶

而我就選擇咗最接近人奶嘅奶粉

雖然奶量只剩餘2 oz左右

但我仍然堅持，並繼續餵餔母乳

實行餵得幾多得幾多，餵得幾耐得幾耐

返工時，定時泵奶；在家時，埋身餵餔

每次返工都好似擔泥咁，重到呢～

即日來回，還好

若言在外地過夜，仲要帶多個熱水煲for烚parts

現在泵3餐，便足夠寶寶食1餐

至於埋身餵餔，則完全沒有影響

奶量雖然下跌，但仍然足夠餵飽寶寶

寶寶每次食完奶就會好滿足地自己走開

仲會對住我冧之之咁笑

母乳餵餔嚟到1歲check point

希望可以做到持續餵餔母乳至2歲

人奶路極不易行，但只要堅持，一定能夠成功

願所有媽媽奶路亨通，長餵長有

Text & Photos：Floreta