download MamiDaily 親子日常 app
【初生BB黃疸】初為人母特別緊張 聽到BB照燈都已很擔心!

【初生BB黃疸】初為人母特別緊張 聽到BB照燈都已很擔心!

懷孕 爸媽分享 產前產後 教育心得
By Matt豬媽媽 on 27 Feb 2020

相信好多媽媽都有經歷過BB黃疸既問題(BB膚色會明顯較黃或紅、眼白黃、個樣都會較攰的)~

Matt豬出世頭兩日飲奶同大小便都正常的,但到第三日早上,兒科醫生就黎同我講BB黃疸指數高,需要入箱照燈幫助退黃!當下心情仲未來得切有任何反應,因為之前已經聽過好多朋友講初生BB好容易面黃(即黃疸),好多BB都有試過照燈,但原來當發生係自己身上時,係會覺得好心痛同無比的擔心!明明好小事都諗到好大件事!

畢竟初為人母短短三幾日,加上荷爾蒙影響下特別易喊,當日下午去餵奶時見到BB被眼罩遮住眼睛,只剩下尿片訓係箱中照燈,個下感覺十分之難受覺得佢好可憐(只有媽媽先覺得的心痛),一抱住佢餵奶個陣啲眼淚就忍唔住踴出黎了⋯
到左夜晚夜闌人靜時又不停諗BB好可憐又喊(眼淺的媽媽),個刻深深明白乜野叫養兒一百歲,長憂九十九。只有做左人媽媽先會明!

好彩,BB照左一日燈黃疸指數已經降到正常範圍,醫生話可以跟我一齊出院,諗左一日終於鬆左口氣,真係太開心啦!如果BB當日唔可以同我一齊出院,我肯定會又擔心又掛住到係咁喊唔洗訓呀~

出院後,隔兩日就要返醫生診所到覆診,雖然仍然未退黃(一般都要兩至三個星期),但醫生話最緊要奶量足夠可以屙多啲都有助退黃(呢樣好重要),避免脫水,留意BB大小便顏色是否正常&次數是否足夠,如果一切都正常就唔需要太擔心的,因為代表BB肝功能開始成熟,慢慢就會退黃的!

最後Matt豬都差不多一個月先完全退黃,不過每個BB都唔一樣的,最緊要Keep住比醫生檢查,若超過一個月就要詳細再檢查了,媽媽們要留意喔~

*如有黃疸問題,BB出院後記得要打電話去母嬰健康院約時間檢查或到私家兒科醫生檢查喔~

更多關於黃疸,新手媽媽可以參考以下來自衛生署網站的資料:

我的寶寶為何會有黃疸?

黃疸是因為身體積聚過多的膽紅素而產生的現象,嬰兒出生後,所需的紅血球數量比胎兒期少,因此紅血球分解會暫時增加,並產生膽紅素。由於初生嬰兒的肝臟未完全成熟,不能及時處理積聚的膽紅素,便會出現新生嬰兒黃疸。

新生嬰兒黃疸會何時出現及減退?

新生嬰兒黃疸一般會在出生後第二至第三天出現。大約到兩至三個星期,嬰兒的肝臟能有效地處理膽紅素,黃疸便會減退。

謝謝收睇Matt豬媽媽湊仔經~新手媽媽一齊加油!

==============================

Text & Photos:Matt豬媽媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道